Бугун футбол. "Олмалиқ" - "Нефтчи"

"Олмалиқ" ўз майдонида "Нефтчи"ни қабул қилади. "Олмалиқ" ҳисобида 32 очко бор ва жамоа 9-ўринни эгаллаб турибди. "Нефтчи" эса 14 очко жамғарган ҳолда 15-ўриндан мустаҳкам жой эгаллаган. 

"Олмалиқ"нинг ўйинида биринчи даврага нисбатан пасайиш юзага келгандек. Буни рақамлар ҳам кўрсатиб турибди. "Олмалиқ" биринчи даврада қаторасида 11та ўйинда ютқазмаганди. Иккинчи даврада эса жамоа еттита ўйиндан учтасида ютқазишга улгурди. 

Биласизми? "Олмалиқ" ўз майдонидаги учрашувларда олти бор ғалаба қозонган ва тўрт марта дуранг ўйнаган. Шунингдек, фақат бир марта мағлуб бўлган. Бу жамоа ўз уйида негадир кам гол уради. 11та ўйинда 11та гол. 

"Нефтчи" эса ҳамон ғалабасиз серияни давом эттирмоқда. Фарғоналик мухлислар "Нефтчи" Абрамов бошчилигида қачон илк ғалабасини қўлга киритаркин дея кутавериб зерикиб қолишди. 

Факт: "Нефтчи" сафардаги биринчи ва ҳозиргача охирги бўлиб турган ғалабасини 7-турда қўлга киритган. Жамоа Жиззахда "Сўғдиёна"ни 1:0 ҳисобида мағлуб этиб қайтган.