Бугун футбол. Бекободда охирги иккита ўйинни ғалаба билан тугатган жамоалар баҳси бўлиб ўтади

Қизиғи шундаки, бугун Бекобод шаҳрида охирги икки ўйинни ғалаба билан якунлаган жамоалар ўзаро баҳс олиб боришади. Бундай дейишимизга сабаб, "Металлург" аввалги иккита баҳсда ғалабага эришди. Жамоа ўз майдонида "Насаф"ни, сафарда "Обод"ни мағлуб этди.

"Қизилқум" эса сафарда "Динамо"дан ва ўз майдонида "Машъал"дан устун келди. Иккала ўйинда ҳам навоийликлар ўз дарвозаларидан тўп ўтказиб юборишмади. Ҳозиргача "Қизилқум" еттита ўйинни сафарда ўтказиб, шундан иккитасида ғолиб чиққан. Икки бор дуранг ўйнаган бўлса, уч марта имкониятни бой берган. Тўплар нисбати 4-7.

Бугунги ўйин "Металлург" учун уйдаги еттинчи учрашув бўлади. Жамоа бунгача уч марта рақибларини мағлуб этган. Бир бор дуранг ўйнаб, икки марта ютқазиб қўйган. Тўплар нисбати 9-7. 

Биласизми? "Қизилқум" охирги бешта ўйиннинг фақат биттасида мағлуб бўлди. Навоийликлар Тошкентда "Локомотив"дан 0:2 ҳисобида енгилишган. Қолган тўрт учрашувда икки дуранг ва икки ғалаба қайд этилган. 

Биласизми? "Металлург" ҳам охирги беш учрашувнинг фақат биттасида имкониятни бой берган. Жамоа "Олмалиқ"дан мағлуб бўлган. Қолган ўйинларда уч ғалаба ва бир дуранг қайд этилган.