Болалар спорти. Қаршида “Футболимиз келажаги” турнири бошланмоқда

Бугунги кунда юртимизда спортнинг барча турлари қатори миллионлар ўйини сифатида эътироф этиладиган футбол жадал суръатларда ривожланмоқда .

Қарши шахридаги “Бинокор” болалар спорт клуби мажмуасида 6-7-8 август кунлари турли ёшдаги маҳалла ёшлари ўртасида “Футболимиз келажаги” футбол турнирини вилоят босқичи бўлиб ўтади.

Бунда футбол мактаблари, клуб ва жамоалар моддий-техник базасини янада мустаҳкамлаш, жамоалар таркибини иқтидорли, келажаги порлоқ ёш ўйинчилар билан тўлдиришга катта эътибор қаратилаётгани қўл келяпти, албатта.

Ҳудудларда, айниқса, республикамизнинг олис қишлоқ ва овулларида яшаб, яшил майдонларда тўп сураётган, қалбида катта футболга меҳри баланд махалла ёшларини аниқлаш, уларни янги марралар сари рағбатлантиришда «Футболимиз келажаги» анъанавий республика турнири тажриба мактаби вазифасини бажариб келмоқда

— Анъанавий тарзда ўтказиб келинаётган «Футболимиз келажаги» республика турнири маҳаллаларда улғаётган ёшларни спортга иштиёқини оширишга, уларнинг эпчил, чаққон ва бақувват бўлиб улғайишига хизмат қилаётир, — дейди Вилоят Футбол Федерацияси мусобақалар ўтказиш бўлими бош мутахасисси Асрор Хаджаев— Бу йилги мусобақада маҳаллалардан саралаб олинган жамоалар иштирок этади. Уч тоифадаги ёшлар ўртасида ўтказиладиган беллашувларда 9-10, 11-12 ҳамда 13-14 ёшли ўғил болалар жамоалари майдонда тўп суриб, ғолиблик учун беллашади.

Турнирда биринчи ўринни олган жамоалар Республика босқичида иштирок этади ва мусобақа ташкилотчилари томонидан рағбатлантирилади.

Фахриддин ЧОРИЕВ.