Бобур Йўлдошев: «Локомотив»дан бошқа ўзбек клубида ўйнамайман»

Шу тариқа «темирйўлчилар» бир мавсумда ҳар икки совринни қўлга киритган бешинчи жамоага айланишди. Мирко Йеличич ва Андрей Микляев шогирдлари ОЧЛнинг чорак финалига қадар етиб бориб, бўлажак вице-чемпион «Ал-Айн»га икки ўйин натижасига кўра имкониятни бой беришди. Умуман олганда, «Локо» қитъа мусобақасида ҳам ёмон таассурот қолдирмади. Жамоа келаси йили Осиёнинг энг нуфузли мусобақасини тўғридан-тўғри гуруҳ босқичидан бошлайди. Биз «Насаф»га қарши кечган кубок финалидан сўнг «Локомотив» ҳимоячиси Бобур Йўлдошевдан интервью олдик. Эътиборга молик жиҳати, истеъдодли футболчи 2010 йилдан бери «Локомотив» шарафини ҳимоя қилиб келяпти. У бошқа клубларда ўйнамаган.

- Бобур, аввало, Ўзбекистон кубоги қўлга киритилгани билан табриклайман. Суҳбатимиз бошида финал ҳақидаги фикрларингиз билан ўртоқлашсангиз.

- Табрик учун раҳмат. Ҳал қилувчи баҳс жуда қизиқарли кечди. «Насаф» ҳам ёрқин таассурот қолдирди. Рақиб жамоа футболчилари охиригача курашишди. Лекин биз учрашув бошида тезкор гол уриб, ғалаба қозонишга муваффақ бўлдик. Шундан сўнг ҳам дарвозани ишғол қилиш учун кўплаб вазиятлар яратганимизга қарамай, улардан унумли фойдалана олмадик. Асосийси, кубокни қўлга киритганимиздан хурсандмиз.

- Тезкор гол «Локомотив»нинг ишини енгиллаштирдими?

- Бундай демаган бўлардим. Шунчаки, ҳисобни очганимиздан сўнг хотиржамроқ ҳаракат қилдик.

- Ўйинга қандай тактика танланганди?

- Ҳужумкорликка урғу бердик. Мураббийлар илк дақиқалардан устунликни ўз томонимизга оғдириб олишимиз лозимлигини уқтиришганди ва бунинг уддасидан чиқдик.

- «Насаф» билан бу йил уч маротаба тўқнаш келдинглар. Мана шу ўйинлардан қайси бири энг қийини бўлди?

- Ҳаммаси ҳам мураккаб кечди. Лекин улар орасида энг шиддатлиси Тошкентда ўтказилди. Чемпионлик масаласини узил-кесил ҳал қилган ўша ўйинда биз 3:2 ҳисобида ғалаба қозонгандик. Драматик кўриниш олган учрашувдан сўнг мухлисларимиз уйларига жуда яхши кайфиятда қайтишганди.

- Кубок финалининг Самар- қандда ўтказилганига муносабатингиз қандай?

- Албатта, ижобий. Ҳар доим ҳам мухлислар билан тўлган стадионда ўйин ўтказавермайсиз. Қолаверса, футбол байрамларининг вилоятларга тақдим этилишини қўллаб-қувватлайман. Кубок финалини томоша қилиш учун минглаб мухлислар келишди, айримлар аренага кира олмай, ташқарида қолиб кетишди. Трибуналар мухлислар билан тўлса, футбол жозибаси ортаверади. Бу эса ўйинчиларга қўшимча куч бағишлайди. Финалларни вилоятларда ўтказиш анъанаси давом этиши тарафдориман.

- Адашмасам, бу сиз қўлга киритган иккинчи кубок бўлди, шундайми?

- Ҳа, илк бор 2014 йили «Локомотив» сафида ушбу совринга эга чиққандим. Лекин бу галгиси ўзгача таассурот қолдирди. «Олтин дубль» барибир, бошқача бўлар экан.

- Майдоннинг ҳолати яхши эдими?

- Бемалол футбол ўйнаса бўлади. Бунинг учун Самарқанд вилояти футбол федерацияси ҳамда «Динамо» клуби раҳбариятига миннатдорчилик билдираман. Барча шароитларни яратиб беришди. Майдон қордан бутунлай тозаланди. Кузнинг сўнгги кунида ўйин ўтказдик, совуқ об-ҳаво шароити ҳукм сурган пайтларда чимнинг ҳолати яхши бўлмайди. Шунга қарамай, ташкилотчилар кенг кўламдаги ишни амалга оширишди.

- Бу йил «Локомотив» учун жуда омадли келди. Таассуротлар бир олам бўлса керак?

- Худди шундай. «Локомотив» клуби раҳбарияти, мураббийлар, футболчилар ва жамоамиз мухлислари бу онларни узоқ кутишган эди. Ниҳоят, орзулар рўёбга чиқди, мақсадимизга эришдик. Ўзбекистоннинг энг кучли жамоасига айландик.

- Мавсум осон кечмагани аниқ. Айтинг-чи, қайси баҳслар чемпионлик йўлидаги энг қийини бўлди?

- Бирор-бир учрашувни алоҳида ажратиб кўрсатолмайман. Биз учун 30та ўйиннинг барчаси мураккаб кечди. Чемпионликка даъвогар жамоага қолган барча клублар жиддий қаршилик кўрсатишди.

- «Локомотив» таркиби жуда кучли. Жамоа айнан шунинг ҳисобига жамоа чемпион бўлиб, кубокни қўлга киритдими?

- Менинг бу борадаги фикрим бироз бошқача. Таркиби кучли жамоа ҳар доим чемпионликка эришавермайди. Бунга ўзимизнинг чемпионатдан ҳам мисоллар кўп. Фикримча, ҳамма гап бирдамлик ва ҳамжиҳатликда. Жамоа аҳил бўлмаса, ягона мақсад сари интилмаса, ниятига етолмайди.

- Бобур, жорий мавсумдаги фаолиятингиздан кўнглингиз тўлдими?

- Афсуски, йўқ. Чунки мавсумнинг катта қисмини майдон ташқарисида ўтказдим. Йилнинг дастлабки палласини деярли соғлиғимни тиклашга сарфладим. Иккинчи давра бошларида ҳам ҳали тўлиқ спорт формасига кирмагандим. Ҳозир ўзимни жуда яхши ҳис қиляпман. Чемпионлик ва кубокни қўлга киритишимизда жамоадошларимнинг ҳиссалари катта бўлди. Бунинг учун уларга раҳмат айтаман.

- Ўз статистикангизни кузатиб борасизми?

- Албатта. Ҳар бир мавсум сўнгида ўйинларимни таҳлил қилиб чиқаман. Нечта баҳсда майдонга тушиб, қанча вақт ўйнадим, буларни ҳаммасини ҳисоблаб бораман. Камчиликларимни йўқотишга интиламан. Шу тариқа ижобийликка эришиш мумкин бўлади.

- Фаолиятингиз давомида фақат «Локомотив» клубида ўйнагансиз...

- 2010 йилдан бери «темирйўлчилар» таркибидаман. Бу жамоа ўз оиламдек бўлиб қолган. Шу кунгача кўплаб мураббийлар қўл остида ўйнадим. Уларнинг ҳар биридан нимадир ўргандим. «Локомотив»ни жуда яхши кўраман. Ўзбекистоннинг энг кучли клубида тўп сураётганимдан хурсандман. Шахсан мен учун 6 йиллик орзум амалга ошди. Фаолиятимда илк бор Ўзбекистон чемпионига айландим. Қувончли онлар бардавом бўлишини чин дилдан истайман.

- «Локомотив»дан бошқа қайси ўзбек клубида ўйнаган бўлар эдингиз?

- Айни пайтда ҳеч қайси жамоада. Ҳа, айнан шундай. Хориждан таклиф тушсагина, клубимни алмаштиришим мумкин. Шунда ҳам раҳбарият розилик берса, кейин кетаман. Юқорида «Локомотив» оиламдек бўлиб қолган дедим. Оилани ташлаб кетиб бўладими? Балки, бу тақдирдир! Ўзимни бошқа жамоа сафида тасаввур қилолмайман. Умуман, олдиндан бир нарса де-йиш қийин.

- Шу пайтгача бошқа клублардан таклифлар тушганми? Нима учун уларни қабул қилмагансиз?

- Албатта, бўлган. 2013 йили Туркиядан таклиф тушган. Жамоа кўригидан ўтиш учун ушбу мамлакатга борганман. Улар мени ёшлар ўртасидаги жаҳон чемпионатида кузатишган экан. Ўзбекистон терма жамоаси кичик мундиалда жуда яхши таассурот қолдирганди. Машғулотдаги ҳаракатларим мураббийларга маъқул келган бўлсада, клублар ўзаро келиша олишмаган. Акс ҳолда, фаолиятимда катта ўзгаришлар рўй бериши мумкин эди. Ўша пайтда «Локомотив» билан амалдаги шартномам бўлган. Шу боис, яна Тошкентга қайтишимга тўғри келган.

- Хориждаги қайси жамоага бефарқ эмассиз?

- «Манчестер Юнайтед» ўйинларини мириқиб томоша қиламан. Шунингдек, Мадриднинг «Реал» клубига ҳам бефарқ эмасман. Бу икки жамоа иштирокидаги учрашувларни қолдирмай кўриб бораман. Мадридликларнинг жорий мавсумдаги ишлари беш. Лекин «қизил иблислар» ҳақида афсуски, бундай дея олмайман. «МЮ» бир неча йилдан бери ўзига келолмаяпти. Мураббийлар алмашди, лекин бу ҳам фойда бермади.

- Суҳбатларимизнинг бирида «Барселона» афсонаси Карлес Пуйолга ҳавас қиламан, дегандингиз. Бугунги кун ҳимоячиларидан кимларнинг ўйини маъқул келмоқда?

- Тўғри, Пуйолнинг мухлисиман. Футбол ўйинларини шунчаки кўрмайман. Ўзим томоша қилган учрашувларда ҳимоячиларнинг ҳаракатларини кузатиб бораман. Бугунги кунда Серхио Рамос, Жерар Пикенинг ўйин-ларидан завқ оламан. Улардан ўрганадиган жиҳатлар кўп.

- Алекс Фергюсондан кейин «Манчестер Юнайтед» ўзига кела олмаяпти. Мураббийлар алмашиши ҳам натижага таъсир ўтказмаяпти. Ушбу клуб мухлиси сифатида мавжуд ҳолат юзасидан нима дея оласиз?

- Шубҳасиз, сер Алекс Фергюсон - «Манчестер Юнайтед» афсонаси. Бундай мураббий яқин 10 йиллар ичида келмаса керак. Ушбу мутахассиснинг жамоа ўйинларини трибунадан куюнчаклик билан кузатаётганини кўриб юрагим эзилади. Ҳозир «МЮ» ўтиш даврини бошдан кечиряпти, лекин бу жараён жуда чўзилиб кетгандек. Аввалги мавқени тиклаб олиш учун жамоага вақт керак. Натижалар қандай бўлишидан қатъий назар, шу клуб мухлиси бўлиб қолавераман.

- Жозе Моуриньо жамоани омадсизликлар гирдобидан олиб чиқиб кета олармикан?

- Буни вақт кўрсатади. Лекин «МЮ»нинг аввалги шони тикланишини жуда хоҳлайман. Менимча, бундай фикрдаги мухлислар миллионларни ташкил қилади.

- Бобур, миллий чемпионатимиз савияси ҳақида кўп гапирил-япти. Шахсий фикрингиз қандай? Жорий мавсумдаги баҳслар мисолида бу борада ўсиш кўзга ташландими?

- Ўтган йилгига қараганда анча ўсиш бўлди, дея оламан. Чемпионатимиз қизиқарли кечди, ғолиблик учун деярли сўнгги тургача кураш давом этди. Олий лигани тарк этадиган жамоа номи ҳам финишда аниқ бўлди. Совринли ўринлар учун курашадиган клублар сони кўпайди. «Пахтакор», «Бухоро», «Металлург», «Қизилқум» турнир жадвалининг юқори учлигидан жой олганларга жиддий қаршилик кўрсатишди. «Бухоро»нинг бронза медалини қўлга киритишига бир баҳя қолди. Ўйлашимча, келаси мавсум янада шиддатли кечади.

- Стадиондаги томошабинлар сони камайди. Бу шиддатли ўйинларнинг камлигиданми ёки бош-қа сабаби ҳам борми? Футболчилар айни мавзуни ҳеч муҳокама қилишадими?

- Албатта. Мухлислар стадионга ташриф буюриб, трибуналарни тўлдириб ўтиришса, мазкур ҳолат футболчиларга қўшимча куч бағишлайди, ўйинларимиз ҳам бошқача чиқади. Ҳозир бироз азарт йўқолгандек туюляпти, бу эса айнан мухлислар билан боғлиқ ҳолат. Қолаверса, бизда маркетинг тизими деярли ишламайди. Ўйинларнинг рекламаси нолга тенг, деса ҳам бўлади. Кўчалардаги афишаларни кўпайтириш керак. Телевидение ва радиода тарғибот йўқ. Ўйиннинг қачон ўтказилишини билмаган ишқибоз стадионга қандай келади? Мухлисларни футболга қизиқтириш даркор. Кўпинча биздан «Қачон ўйнайсизлар, учрашув соат нечада бошланади?» деб сўрашади. Бу бироз кулгили ва қайсидир маънода аянчли ҳолат. Қолаверса, ўйинлар томошабинлар учун қулай вақтга белгиланиши лозим. Қоқ пешинда кимнинг ҳам футбол кўргиси келарди? Одамлар ишдан бўшаб, кейин стадионга ташриф буюришади. Бутун дунёда шундай, бизда эса акси. Агар мана шу айтиб ўтилган камчиликлар бартараф этилса, спорт иншоотларида аншлаг кузатилади. Мен бунга ишонаман. Яна бир нарсани айтиш эсдан чиқибди. Ривалдо юртимизда тўп сурган кезлари стадионлар ишқибозларга тўларди. Томошабинлар бразилиялик футбол юлдузининг ўйинини кўриш учун стадионга келишарди. Демак, олий лигага юлдуз легионерлар ҳам керак.

Камолиддин АЛИМОВ суҳбатлашди