Бобир Абдихолиқов: "Фаолиятимда биринчи маротаба чемпион бўлдим ва бундан жуда хурсандман"

- Авваламбор, чемпионлик билан табриклаймиз. Бугунги учрашувдан аввалги ва учрашувдан кейинги ҳиссиётларингиз билан бўлишсангиз

- Мавсум бошланишидан аввал олдимизга чемпионликни мақсад қилиб қўйган эдик ва яратганга шукур, бугун ушбу мақсадимизга эришдик.

- Қозоғистон чемпионатидаги биринчи мавсумингиз қандай ўтди? Жорий мавсум намойиш этган ўйинингиздан қониқдингизми?

- Биринчи навбатда жамоавий вазифани бажардик. Жорий мавсум мен учун катта тажриба бўлди. Ўз фаолиятимда биринчи маротаба чемпион бўлдим ва бундан жуда хурсандман. Мавсум мен учун ажойиб бўлди.

- "Ордабаси" жамоасига ўтишингиздан аввал сизга Европадан таклифлар бор эди ва ўзингиз ҳам Европада фаолиятингизни давом эттиришни истаётганингизни кўп маротаба айтиб ўтгансиз. Қозоғистон чемпионати сиз кутган даражадаги эканми?

- Ҳа, менда кўп таклифлар бор эди, аммо "Ордабаси"ни танлаганимнинг сабаби, жамоа ўз олдига катта мақсадлар қўйган эди. Чемпионат ҳам жуда қизиқарли ўтди. Мен "Ордабаси"га ўтганимдан афсусланмайман ва якунда қарорим тўғри бўлиб чиқди.

-  Мавсум якунида клуб билан шартномангиз тугайди. Кейинги режаларингиз қандай? Сизни бошқа жамоада кўрамизми ёки "Ордабаси"да қолиб, Чемпионлар лигасига йўлланмани қўлга киритишни ният қилганмисиз?

- Мавсум якунланишига иккита ўйин қолди. Бизни кубок финали ҳам кутиб турибди. Мавсумни тугатиб олгандан сўнг қарор қабул қиламан. Олдиндан бирор нарса дейиш қийин.

- "Ордабаси"нинг ҳужум чизиғини икки ўзбекистонлик футболчи "ёндирди".  Фикрингизча, Шаҳбоз ва сиз жамоангизнинг чемпионлигига қанчалик ҳисса қўшдингизлар?

- Шаҳбоз ва мен мавсум давомида жамоамизга максимал тарзда ёрдам беришга ҳаракат қилдик ва чемпионликга катта ҳисса қўшдик деб ўйлайман. Чемпион бўлганим менга янада кўпроқ куч беради. Олдинда терма жамоа йиғинлари ва Осиё кубоги бор. Ҳали қиладиган ишларимиз кўп.