“Андижон” сафига литвалик футболчилар қўшилади

3-15 январь кунлари оралиғида ўтадиган бу сафарги йиғин ҳам Андижонда олиб борилади. Январь ойида андижонликлар сафига легионерлар қўшилишини хабар қилгандик. Бу легионерлар кимлар эканлигини ўқувчиларимизга айтиб ўтмоқчимиз. Иккала футболчи ҳам Литвадан ташриф буюради.

Булар - ҳимоячи Гедминас Паулаускас ва ҳужумчи Нериюс Астраускас. Иккала футболчи ҳам Литванинг етакчи клубларида тўп сурган. 1980 йилда туғилган Астраускас Литвадан ташқари Кипр, Греция ва Мальта мамлакатларида ҳам фаолият олиб борган. Мальтада у “Рабат Аякс” клубида ўйнаган. 2013 йилги мавсумни ҳужумчи Литвада “Круоя” жамоасида ўтказган. Бундан кўриниб турибдики, бу ҳужумчида тажриба юқори. Лекин Паулаускас ва Астраускас “Андижон” машғулотларида қатнашиб кўрикдан ўтишади. Легионерларнинг ҳаракатлари мураббийларга маъқул келса улар билан шартнома имзоланади.

Легионерлардан ташқари январь ойида “Андижон” сафига Шуҳрат Мирхолдиршаев ҳам қўшилади. Тажрибали ҳужумчи 2009-2010 йилларда айнан шу жамоада тўп сурганини мухлислар яхши билишади. Бундан ташқари мураббийлар яна бир қатор маҳоратли ўйинчилар билан ҳам музокараларни давом эттиришмоқда.