Андижонликлар Қозоғистондаги турнирни ғалаба билан бошлади
24 мар 2019 19:01
Новости

Андижонликлар Қозоғистондаги турнирни ғалаба билан бошлади

Андижон шаҳридаги “Андижон Футбол Академия” тарбияланувчиларидан иборат бўлган болалар жамоаси ҳар йили Россия ва Қозоғистон давлатларида ўтказиладиган халқаро турнирларда иштирок этиб келмоқда.

Жорий йилнинг 24 март куни Қозоғистон Республикасининг Олма-Ота шаҳрида навбатдаги халқаро мусобақага старт берилди.

Унда “АФА” жамоаларидан ташқари Россия, Қирғизистон, Тожикистон ва Туркманистон давлатларидан ҳам жамоалар ташриф буюрганини эътироф этиш лозим.

Мазкур мусобақада “АФА”дан иккита жамоа иштирок этмоқда. Яъни Шохруҳ Ишанов бошқарувидаги “АФА-SGS Shiringaz-2005” ҳамда Лочин Гулдаев мураббийлигидаги “АФА-SGS Shiringaz-2006” жамоаси.

2005 йилда туғилган футболчилар ўртасидаги мусобақада жами 12та жамоа 3та гуруҳга бўлинган холда, ғолиблик учун кураш олиб бораётган бўлса, 2006 йилда таваллуд топган болалар жамоалари сони 16тани ташкил этди.

Аҳамиятлиси “АФА-SGS Shiringaz-2006” жамоаси турнирдаги илк учрашувини ғалаба билан якунлади. Қозоғистоннинг “Остона-Цесна” жамоасига қарши кечган учрашувда Абдуғани Ғуломов томонидан киритилган ягона гол якунда андижонликларнинг ғалабасини таъмиинлади.

“АФА-SGS Shiringaz-2005” жамоаси эса чемпионатнинг дастлабки турида Қирғизистон чемпиони “Бишкек-Илбирс” жамоаси билан рўбарў келди. Якунда томонлар 2:2 ҳисобида дурангга имзо чекди. Қизиқарли ва муросасиз тарзда кечган баҳсда андижонликлардан Азизбек Усмонов дубл муаллифига айланди.

Маълумот учун мазкур мусобақа 31 март кунига қадар давом этади.