Али Ашур: "Андижон" бугун жуда кўп югурди, улар ўз мухлислари учун жанг қилишди. Баъзида бундай энергияга қарши курашиб бўлмайди"

"Иккала жамоа бир очкодан қўлга киритди. Биз икки очко йўқотдик ҳам дея оламан. Натижа адолатли бўлди. Учрашувни ажойиб тарзда бошлагандик, ўйинни бошқардик. Баъзида гол уриш лозимлигини унутиб қўйдик. Кўп пас бериш оқибатида бир неча бор тўп йўқотдик. "Андижон" бу вазиятлардан унумли фойдаланиб, қарши ҳужумларга қочди. 23 рақамли ўйинчи [Дониёр Абдуманнопов – таҳр. Championat.asia] жуда хавфли бўлди, бўш зоналарга югура бошлади. Иккинчи бўлимда йигитлар билан гаплашдик ва муаммони ҳал қилдик. Бир неча ўзгаришлар амалга оширдик, аммо гол ура олмадик. Яна айта оламанки, натижа адолатли бўлди", -дейди Али Ашур.

– Жамоангиз учрашувнинг 30-дақиқасигача ташаббусни қўлга олди. Ундан кейин эса устунлик бой берилди. Бу нима билан боғлиқ?

– Айтганимдек, ўйинчиларим гол уриш кераклигини унутиб қўйишди. Пас пас ва яна пас, тўп назорати 70% атрофида эди. Бироқ, ўйинни ютиш учун гол уриш керак. Саволинга жавоб сифатида ярим ҳимоячиларимизнинг суст ҳаракати ва рақиб мухлисларини сабаб қилиб кўрсатган бўлардим. Иккинчи бўлимда барчасини ўнгладик. 

– Кеча ўйиндан олдинги матбуот анжуманида рақиб яхши ўрганилгани ҳақида гапирганди. "Андижон" мураббий кутган ўйинни кўрсата олдими?

– Ўйиндан олдин рақибда жуда яхши мураббий ва жуда зўр ўйинчилар борлигини ҳам айтиб ўтгандим. "Андижон" бугун жуда кўп югурди, улар ўз мухлислари учун жанг қилишди. Баъзида бундай энергияга қарши курашиб бўлмайди. 23 рақамли ўйинчи ва жамоа сардори буган ўта яхши ўйин кўрсатишди. Мен хайратда қолдим. Биз шу ҳолатда ҳам рақибни жазолашимиз мумкин эди, аммо бунинг иложи бўлмади. 

– 5 ноябрь куни икки жамоа ўртасида Баҳрайнда ўйин бор. Жавоб учрашувида қандай ўйин кутмоқдасиз?

– Баҳрайнда тамомила бошқача ўйин бўлиши аниқ. Чунки биз ўз уйимизда ўйнаймиз. Ҳозирда эса биринчи навбатда "Ал Аҳли"га (Қатар) қарши ўйинга эътиборимизни қаратамиз. 

– "Андижон" мухлислари ва "Бобур Арена" сизга қанчалик ёқди?

– Мен мухлисларни жуда яхши кўраман. Баҳрайнда ҳам шундай мухлисларимиз бор. Стадион ажойиб, чим ҳам яхши. Фақатгина дарвозабон ҳудудида бироз камчиликлар бор, аммо буни тўғриласа бўлади. Ҳаво яхши эди, овқатлар ҳам ширин. Шаҳар ва мамлакат эса ажойиб.