Шуҳрат Мақсудов: "Бош мураббийни ишдан олиш ёки тайинлаш мухлисларнинг иши эмас"

- Ўйин ҳақида

- Бунақанги ўйин, бунақа натижа учун биринчи навбатда мухлислардан узр сўраймиз. Мен ўзим ҳам тушунолмай қолдим, йигитларда бугун ҳеч нарса ўхшамади. "Нефтчи" билан ўйиннинг эртасигаёқ "Олимпик" билан баҳсга тайёргарлик кўришга киришгандик. Ҳеч қайси футболчимизнинг ўйини чиқмади. Жамоа ютса, демак, ҳамма ютади. Мағлубият учун мураббий айбдор. Лекин биз бугун бутун жамоа ютқаздик. "Олимпик"ни ҳаққоний ғалаба билан табриклайман.

- "Бунёдкор"нинг айни пайтдаги натижалари мураббийнинг истеъфосига сабаб бўладиган даражада эмас. Нима деб ўйлайсиз, мухлислар томонидан сизнинг истеъфонгиз талаб қилиниши тўғрими?

- Ўзингиз айтиб турибсиз, жамоанинг натижалари ёмон эмас. Биргина мағлубият учун шундай ҳаракатни амалга оширган бўлсалар, билмадим, очиғи, эътибор қаратганим йўқ. Жамоа бош мураббийини ишдан олиш мухлисларнинг иши эмас. Такрор айтаман, "Бунёдкор"нинг ҳақиқий мухлисларидан узр сўрайман. Мен ваъда берганман, биз аввалги "Бунёдкор"ни қайтариш ҳаракатидамиз.

- Мухлислар орасида уларни сизга қарши йўналтириб турган шахслар бор деб ўйлайсизми?

- Илтимос, бундай провакацион савол берманглар. Журналист маданиятга риоя қилган холда савол бериши лозим. Бу каби саволарга жавоб беришни истамайман, футбол ҳақида сўранглар, бемалол жавоб бераман.