“Водий футболи”. “Нефтчи”нинг мағлубиятсиз сериясига барҳам берилди

“Андижон”: Ғалабадан кейинги енгил машғулот
Кеча “Андижон” жамоаси водий дербисида “Навбаҳор”ни 3:2 ҳисобида мағлубиятга учратиб мухлисларни хурсанд этди.
Кечаги ўйиндан кейин бугун енгил машғулот бўлиб ўтди. Аниқроғи, кеча майдонга тушмаган футболчилар машғулотларда шуғулланишди. Бош мураббий жамоага таътил бермади ва бугундан “Металлург”га қарши ўйинга тайёргарлик бошланди. Албатта, эрталабки енгил машғулотдан сўнг куннинг иккинчи ярмида дам олишади. Эртадан эса машғулотлар жиддий суръатда бошланади.

“Қўқон-1912”: Жалил Кимсанов кейинги икки ўйинни ҳам ўтказиб юборади
8-турда “Қизилқум”га қарши кечган баҳснинг 15-дақиқасида ҳакам томонидан тўғридан-тўғри қизил карточка билан жазоланган Жалил Кимсановни шундан кейин ПФЛ тартиб интизом қўмитаси 3та учрашувга дисквалификация қилди.
29 ёшли футболчи кеча Қўқонда “Шўртан”га қарши кечган баҳсда иштирок эта олмади. Айтиш лозимки, Кимсанов энди 10-турда “Локомотив” ва 11-турда “Навбаҳор”га қарши кечадиган ўйинларни ҳам ўтказиб юборади.

“Навбаҳор”: Бугун футболчиларга дам берилди
Кеча олий лига 9-доирасида “Навбаҳор” жамоаси “Андижон”га сафарда 2:3 ҳисобида имкониятни бой бериб қўйди. Кечаги учрашувдан кейин бугун барчага бир кунлик дам берилган. Демак, эртадан яна машғулотларга киришилади.

“Нефтчи”: Олий лигадаги мағлубиятсиз серияга барҳам берилди
Кеча “Пахтакор”га 0:2 ҳисобида имкониятни бой бериб қўйган “Нефтчи”нинг олий лигадаги мағлубиятсиз сериясига чек қўйилди. Шу кунга қадар миллий биринчилик доирасида 9 та ўйиндан буён ютқазмай келаётган Мурод Исмоилов шогирдларининг чиройли сериясига Самвел Бабаян бошчилигидаги “Пахтакор” ўйинчилари барҳам беришди.