Валерий Карпин: «Ҳозирги «Спартак» кучлироқ»

— Каррера «Спартак»нинг ўйинига қандай янгилик олиб кирди?

— Кўп эҳтирос, истак ва кураш. Лекин бу жиҳатлар ундан олдин ҳам баъзан бўлиб турарди. Шахсан мен «Спартак»нинг қандай усулда ўйнаётганини тушунмайман. Шунга қарамай, жамоа яхши тўп сурмоқда. Бироқ аниқ тасвир йўқ.

— Демак, натижа муайян ўйин услубидан муҳимроқ эканда?

— Сиз аниқ бир усулни кўряпсизми? Шахсан мен кўрмаяпман. Жамоа очиқми, ёпиқми, ҳужумкорми, қандай ўйнаётганини аниқлаб олиш қийин бўляпти.

— Кўпроқ ҳужум қилишмоқда.

— Бунга қўшилмайман. Ҳужумкорлик худди олдингидек. Айтайлик, Аленичев даврида ҳам шундай бўлган.

— Ҳозир «Спартак» фақат эҳтирослар туфайли яхши ўйнаяптими?

— Албатта, алоҳида футболчиларнинг маҳоратларини ёддан чиқармаслик керак. Бокетти, Комбаров, Фернандо, Глушаков, Промес, Попов, Зобнин кабилар бор. Аммо уларнинг кўпчилиги олдин ҳам жамоа сафида бўлишган. «Спартак»нинг бугунги натижаси футболчилар маҳорати ва эмоциялари маҳсули. «Зенит» ёки «Ростов»нинг қандай футбол намойиш қилишини айта оламан. Бироқ Карреранинг жамоаси ўйнини ҳозирча тушунмаяпман.

— Нима учун Аленичевнинг ишлари юришмади?

— Буни билмайман.

— У бошқарганда «Спартак»ка нима етишмаганди?

— Ҳаммасидан бир шингил.

— Дмитрий Анатольевич жамоани қабул қилиб олганда, «Спартак»­нинг собиқ мураббийлари, фахрийларидан маслаҳатлар олишини айтганди. Шунингдек, сизнинг исмингизни ҳам тилга олганди. У сиздан маслаҳат сўраганмиди?

— Йўқ, ундай бўлмаган. Аленичев билан бу борада бирор марта ҳам мулоқот қилмаганмиз.

— Ёш футболчилардан қайсилари ўзини кўрсатяпти?

— Майдонга тушаётганлари. Мураббий ўзига душман эмас. Майдонга кучлиларни туширади. Кутепов, Мелкаде, Зуевлар ўзларини кўрсатишга қодирлар. Лекин келинг, жамоа таркибига назар соламиз. Зуевнинг чизиғида ким ўйнайди? Попов, Промес. Агар Зуев ўшалардан кучли бўлганида асосий таркибда ўйнарди.

— «Спартак»дан клуб тарбияланувчилари тез-тез кетиб қолишади. Шу ёзда жамоани Сергей Паршивлюк ва Павел Яковлев тарк этишди. Бунга муносабатингиз қандай?

— Оддий ҳол. Жаҳон футболининг топ-клубларида қанча тарбияланувчилари ўйнаяпти? Масалан, «Реал»ни олсак, фақат Мората бор. Уни ҳам аввал сотиб юбориб, кейин қайтаришди. «Атлетик» (Бильбао) таркибида фақат басклар ўйнаши билан машҳур. Лекин чуқурроқ кавласангиз, ярим таркибнинг баскларга умуман алоқаси йўқ. Қайдандир Басконияга дахлдор бўлган бобо-момоларни топиб олишган.

— «Спартак»нинг қайси трансферини омадли деб ҳисоблайсиз?

— Кўпларини. Алекс, Веллитон, Эменике, Бокетти, Глушаков, Комбаров... Шунингдек, Кариока трансферини жуда омадли деса бўлади. Ҳозирги вақт ҳақида гапирсам, Фернандо, Промес, Зобнин... Балки қайсидир харидларни эсга олмагандирман. Лекин ҳақиқатан ҳам муваффақиятли трансферлар кўп бўлган.

— Уларнинг аксарияти ҳозир «Спартак»да эмас. Бунинг сабаби нимада?

— Алекс оилавий муаммолар туфайли кетди. Веллитон эса ўз устида ишламай қўйди. Эменике учун яхши тўлашди. Унинг ўзи ҳам кўпроқ маош олишни истади. Бу футболдаги оддий ҳол.

— Кариока «Спартак»нинг сўнгги йиллардаги энг яхши харидими?

— У шартномасини ажойиб тарзда бажарди. Икки марта иккинчи ўринни олиб берди. 19 ёшли йигитчадан яна нима талаб қилиш мумкин?

— Мураббийлик пайтингизда қайси футболчи билан ишлашда қийналгансиз?

— Макгиди. Антиқа инсон. У мен бирга ишлаган энг иқтидорли футболчилардан бири. Ўз навбатида, инсоний тарафдан энг оғир одамлардан. Шунчалик иқтидор билан чемпионшипда ўйнаб юрибди. Макгиди «Спартак»да тўп сурганида унга очилиши учун мураббийлар, муҳит, Россия ва қўшнилар имкон беришмаяпти деб, ҳисоблашарди. Аслида эса, у характери оғир инсон.

— Очилиб кетолмаган энг иқтидорли футболчи ким?

— Яна ўша Макгиди ва Квинси Овусу-Абейе.

— Ким ўз имконияти даражасидан ҳам яхшироқ ўйнаган?

— Алекс. Лекин фақат бир йил, холос. Веллитон билан ҳам шундай ҳолат рўй берган.

— «Спартак» ҳаракат қилиб қўлга кирита олмаган қайси футболчи якунда юлдузга айланган?

— Шундайлардан бири Аксель Витсель. У билан музокара ўтказганимизда ҳали Бельгияда ўйнарди ва эндигина 19 ёшда эди. Ўшанда Россияда ўйнашни истамаганди. Шунингдек, кейинчалик Донецкнинг «Шахтёр»ига ўтиб кетган бразилиялик футболчиларга ҳам қизиққанмиз. Нима учун «Шахтёр»? Шунчаки, улар кўпроқ пул тўлашган.

— Бирор-бир футболчи билан дўст­лик муносабатларини ўрнатганмисиз?

— Йўқ, лекин айримлари билан SMS ёзишиб турамиз.

— Нима учун россиялик футболчилар топ-чемпионатларда ўйнашмайди?

— Нега Европада Россия автомобилларини харид қилишмайди? Агар уларнинг баҳоси 500 евро бўлганида сотиб олишлари мумкин эди. Футболда ҳам шундай. Қолаверса, ўйинчиларнинг ўзлари ҳам кетишни исташмайди. Чунки Россияда икки баравар кўп пул ишлаб топишади. Бунинг сабаби нимада? Албатта, лимитда.

- Бугунги «Спартак» 2009 йилдагисидан кучлими?

— Албатта. Бир бош устун.

Ҳ. Масаидов тайёрлади