Улуғбек Бақоев: "Бухоро" футболчиларининг олдида хижолатдаман"

"Бобуржон Омоновни жароҳати боис мажбуран ўзгартирдик, ўшандан кейин икки дақиқа ичида иккита гол ўтказиб юбордик. Биринчи таймда вазиятлар бўлганди. Гол уришимиз ҳам, кўп гол ўтказишимиз ҳам мумкин эди. Ўйлашимча бугун "Пахтакор" ҳақли равишда ғалаба қозонди", - дейди Улуғбек Бақоев.

"Оғир ўйин бўлди, Ўзбекистоннинг энг кучли жамоаларидан бирига қарши. Биринчи тайм ёпиқ ва ҳимоядан ўйнадик, иккинчи таймда эса натижа ҳам бундай ўйнашга имкон бермади. Рақиб ҳам осон ғалаба қозонмади деб ўйлайман. Кейинги ўйинларда "Пахтакор"га омад тилайман", - дейди Шаҳбоз Эркинов.

- "Бухоро"нинг қониқарсиз натижаларига нима сабаб бўлмоқда? Молиявий ҳолатми?
- Руҳий томонлама албатта ҳар бир меҳнатга ҳақ тўланиши лозим. Ҳозирги кунда йигитлар молиявий муаммо туфайли қийналишмоқда. Барча ўйинларга тайёрлангандек тайёрланаяпмиз, машғулотларда ишлаяпмиз. Футболчиларда жисмоний ҳолати яхши, руҳий жиҳатдан бундай дея олмайман.

- Молиявий инқироз давом этаверса сизнинг мураббийлик фаолиятингизга таъсир қилмайдими?
- Менимча бу савол кўпроқ раҳбариятга бўлса керак. Улар ваъда беришган, ваъда беришмоқда. Очиғи йигитларнинг олдида ҳозир хижолатдаман. Сабаби барча футболчиларнинг оиласи бор, фарзандлари бор. Ҳозир фақат кутаяпмиз, ижобий янгиликлар бўлишини кутамиз. Шахсан ўзимга келсак "Бухоро" билан шартномамни охиригача ишлайман, мавсум охирида кўрамиз.