Улар 16та эди, 8та қолишди

Шундай қилиб Ғарб минтақасидан тўртта, Шарқ минтақасидан ҳам тўртта клуб чорак финалга йўл олди. 23 май куни чорак финал баҳсларига қуръа ташлаш маросими бўлиб ўтади.

Бизни хурсанд қилган жиҳати, ҳамюртимиз Сервер Жепаров ўйнаётган Эроннинг "Истиқлол" клуби ҳам чорак финалда ўйнайди. Хафа қилган томони эса Одил Аҳмедовнинг жамоаси "Шанхай СИПГ" ўз иштирокини 1/8 финалда тўхтатди. Маълумки, бу жамоа ўтган йил ярим финалгача борганди.

Чорак финалга йўл олган клублардан "Персеполис" билан "Тианжин Куанжиан" меҳмонда урилган гол туфайли ижобий натижа қайд этди. Эътиборлиси, чорак финалга Қатар ва Эрондан иккитадан клуб йўл олди. Саудия ва БАА клубларидан ҳеч ким қолмади. Ўзбекистон эса ўз иштирокини гуруҳ босқичидаёқ тугатиб бўлганди.

Шарқ минтақасида чорак финалда ўйнайдиган жамоалар орасида Жанубий Кореядан иккита клуб бор. Шунингдек, Хитой ва Япониядан биттадан жамоа бўлади.

Қуйида мусобақанинг 1/8 финалида иккала ўйин натижасига кўра қайд этилган ҳисобларни келтириб ўтамиз.    

"Ал Садд" - "Ал Аҳли" 4:3
"Персеполис" - "Ал Жазира" 4:4 ("Персеполис" меҳмонда урилган гол эвазига кейинги босқичга йўл олди)
"Истиқлол" - "Зоб Аҳан" 3:2
"Ал Дуҳайл" - "Ал Айн" 8:3

"Чонбук Хюндай" - "Бурирам Юнайтед" 4:3
"Тианжин Куанжиан" - "Гуангжу Эвергранд" 2:2 ("Тианжин" меҳмонда урилган гол эвазига кейинги босқичга йўл олди)
"Сувон Самсунг" - "Ульсан Хюндай" 3:1
"Кашима Антлерс" - "Шанхай СИПГ" 4:3

ОЧЛ-2018. Чорак финалда ўйнайдиган жамоалар

Ғарб минтақаси
"Ал Дуҳайл" (Қатар)
"Ал Садд" (Қатар)
"Истиқлол" (Эрон)
"Персеполис" (Эрон)

Шарқ минтақаси
"Чонбук Хюндай" (Ж.Корея)
"Тианжин Куанжиан" (Хитой)
"Сувон Самсунг" (Ж.Корея)
"Кашима Антлерс" (Япония)