U-20га: Муҳими, қўрқманг! Натижа учун эмас, мухлислар учун жон беринг!

Аввало бир нарсани тан олайлик, бугунги кундаги савиямиз ва болалар футболидаги сиёсатдан келиб чиқсак, ЖЧда иштирок этишнинг ўзи юқори натижа. Лекин бу СИЗлар бориб ютқазиб келинг дегани эмас, ўз навбатида СИЗдан юқори натижани ҳам кутишга ҳаққимиз йўқ. Чунки пойдевор аслида қандай эканлигини яхши биламиз.



Ўзбекистон олимпия терма жамоаси Иорданиянинг шарофати туфайли Қатар йўлланмасини қўлга киритганидан кейин ёзган мақоламга Александр Гейнрих муносабат билдирар экан, шундай дейди:
- Биз ёшлигимизда терма жамоадан чақирув олмасак, кечалари билан йиғлаб чиқардик. Ҳозир эса мукофот борми ёки йўқ деган савол билан мурожаат қилишяпти.

Бу гапнинг замирида қанчалик таъсирли гап ётганини, ўз пайтида терма жамоага туша олмаганлар билади. Жаҳон чемпионатига 21 нафар футболчимиз йўл олди. 30 миллиондан ортиқ аҳолисига эга Ўзбекистондан айнан мана шу 21 нафар футболчи эртадан эътиборан барча - барчанинг диққат-марказида бўлади.

Илк маротаба ЖЧга чиққанимиз ёдингиздами, 2003 йил сиз энди сакки ёш эдингиз. Энди иккинчи синфга чиққандингиз. Ораларингизда Гейнрихни Аргентина терма жамоасига чамаси 35 метрлардан урган голини кўрганлар бордир. Ўзбекистон ёшлар терма жамоаси ўшанда аламли тарзда мағлубиятга учраганди. Учрашувнинг сўнггида Нестеров ўз жарима майдончамиз ичида қўполлик ишлатади ва пенальтидан ҳисоб 2:1 кўриниш олади.

Нима учун муаллиф бу гапларни ёзяпти деб ўйлаётган бўлсангиз керак, бу мақолам футболчиларимизга тегишли. У пайтлар футболимизда бугунгидек катта пул, кети узилмас йиғинлар йўқ эди. У пайт футболчилар том маънода жаҳон чемпионатига ВАТАН учун йўл олган эдилар. Қайтсам мана шунча пул оламан деган гаплар хаёлга ҳам келмади. Гарчанд гуруҳдан чиқа олмаган бўлишса-да, улар Ватан шарафини муносиб ҳимоя қилгандилар. Ўйин борасида на Испанияга, на Аргентинага имконият бой берилган. Улар Тошкентга Гейнрих, Иномов, Нестеров, Бикмаев, Суюнов, Магдеев, Ҳасанов ва Тожиев бўлиб қайтдилар. Улар кейинчалик миллий терма жамоа шарафини муносиб ҳимоя қилдилар ва ҳимоя қилиб келяптилар. Бугун уларнинг ҳеч бирини пулга қараб қолган жойи йўқ. Ўз пайтида ёшлар терма жамоасидаги иштирокини Ватанга садоқат деб билдилар, ёшликда пулга ружу қўймадилар. Қачон менга мукофот пулини берасизлар деб ўйин бошланмасидан аввал ҳархаша қилмадилар. Аксинча, олий лигада ишладилар, миллий терма жамоага кириш учун меҳнат қилдилар. Кейин Суюнов ва Нестеровдан бошқа юқорида санаб ўтилган футболчиларнинг барчаси хориж футболи ҳавосини олдилар. Суюнов "Пахтакор"да узоқ йил тўп тепди. Нестеров эса ҳар мавсум чемпионатнинг энг кучли жамоасидан ўрин оляпти. Ўз пайтида пулни қувмаган футболчиларимизни, бугун пул қувиб юрибди. Футболнинг асосий қоидаси ҳам аслида шу.



Энди мақолани ўқиётган футболчилар диққат қилинг!

Бугун сизнинг даврингиз келди. Даврни ушлаб қолиш на менинг, на бошқа бировнинг қўлида. Барчаси ўзингизга боғлиқ. Шу пайтгача 1983 йилда таваллуд топган футболчиларимизни ҳисобга олмаса, 1989 ва 1993 йилдаги йигитларимиз бугун Борисов шогирдлари каби терма жамоадан муқим жой олмадилар. Сизларда ҳозирча мана шу авлод йўл қўйган хатони қайтармаслик имконияти бор. Бунинг барчаси ўз қўлингизда. Эртага Гондурасга қарши майдонга тушасиз. Хаёлингиздан барча нарсани чиқариб ташланг. Яна бир тарихга қайтаман. Ўзбек спорти тарихида қишки спорт турлари бўйича ягона олтин медали соҳибаси Лина Черязова фристайлда биринчи ўринни қўлга киритади. Бир кун аввал унинг онаси хизматини ўташ чоғида фожеали тарзда вафот этади. Шоҳсупага чиқар экан, терма жамоа маъмури унга бу ҳақда айтади. Унинг кўз ёшлари ўша лаҳзада Норвегия тоғларида музга айланади. Бу гапларни нима учун сизларга айтаяпман. Айни пайтда сизнинг уйингиз тинч, Ватанингиз тинч, ота-онангиз соғ ва саломат. Миллиондан ортиқ мухлисларингиз кўз тикиб турибди. Шундай экан, фақат ва фақат Ватан учун эртага майдонга тушишга мажбурсиз! Бир зум бўлса-да, чекинманг, рақибни салобатидан қўрқманг. Улар ҳам сиз каби футболчи.

2009 йил Ўзбекистон Уругвайга қарши майдонга тушганида, уругвайлик футболчилар вакилларимиз олдига келиб ерга тупурган экан.
"Шунинг ўзиёқ бизни ҳаяжонланишимизга сабаб бўлган эди", - дея айтиб берганди бир футболчимиз. Сиз эса бундан қўрқманг. Мардларча чиқинг майдонга, юқорида айтиб ўтдим, ғалаба бўладими мағлубият бўладими шахсан менга фарқи йўқ, фақат эркакка ўхшанг, таслим бўлманг. Бу ҳали бошланиши, ҳали МТЖ бор!



Жавоҳир, сен сардорсан! Жамоанг шундай ўйнасинки, тўп учун курашда ёрилиши мумкин бўлган бошни эмас, 30 миллион халқни ўйласин. Шундай ўйнангларки, ота-онангиз маҳаллада, бу менинг фарзандим деб керилсин. Чойхоналарнинг тўри уларники бўлсин. Укангиз мактабда мақтансин, акангиз керилсин бу менинг укам деб! Бўлди, айтар гапим шулар эди.

Қани кетдик йигитлар, Ватан сиз учун, сиз Ватан учун!

Нодирхўжа Юлдашев