“Сиз Қўқон-1912” жамоасида ўйнашни хоҳлайсизми?” мусобақаси якунига етди

Унда 1998 ва 1999 йилда туғилган футболчилардан иборат тўрт жамоа иштирок этди. Булар, “Кимёгар” (Қўқон шаҳри), “Қўқон-1912″ тайёрлов гуруҳи, “Қўқон терма жамоаси” ва “Оқ-олтин” (Риштон тумани) жамоаларидир.

Мусобақанинг биринчи кунидаги илк учрашувда  Иброҳим Мамадиев бошчилигидаги “Кимёгар” жамоаси Мирсаид Миролимов бошқарган “Қўқон терма жамоаси”га қарши майдонга тушди. Ўйинда “Кимёгар” вакиллари 3:1 ҳисобида ғалаба қозониб, финалга йўлланма олишди.

Иккинчи учрашувда Наримон Асанов бош мураббийлигидаги “Қўқон-1912” тайёрлов гуруҳи жамоаси Риштон туманининг “Оқ-олтин” клубига қарши майдонга тушди. Учрашувнинг сўнгги дақиқаларда учта тўп киритган қўқонликлар 3:0 ҳисобида рақибдан устун келиб, иккинчи финалчига айланишди.

Турнирнинг иккинчи куни ҳам қизиқарли баҳсларга бой бўлди. Аввалига Риштоннинг “Оқ-олтин” ва “Қўқон терма жамоаси” учинчи ўрин учун курашга киришишди. Учрашувда Мрсаид Миролимов шогирдлари 4:1 ҳисобида ғалабага эришди.

Ҳал қилувчи ўйинда “Кимёгар” ва “Қўқон-1912” тайёрлов гуруҳи жамоаси майдонга тушди. Қизиқарли ва тенг курашлар остида ўтган ўйинда омад Иброҳим Мамадиев шогирдларига кулиб боқди. Учрашувнинг асосий вақти дуранг натижа билан якун топди. Пенальтилар сериясида “Кимёгар”нинг қўли баланд келди ва бош соврин эгасига айланди.

Мусобақа якунига етгач, ғолиб ва совриндорлар “Қўқон-1912” клуби раҳбарлари томонидан кубок ва диплом билан тақдирланишди.

Бундан ташқари, “Қўқон-1912” ўринбосарлари мураббийлари бир қатор иқтидорли ёшларни кўз остиларига олиб қўйишди.

“Сиз Қўқон-1912” жамоасида ўйнашни хоҳлайсизми?” мусобақаси совриндорлари билан танишинг:

1-ўрин: “Кимёгар”. Бош мурабий-Иброҳим Мамадиев.
2-ўрин: “Қўқон-1912” тайёрлов гуруҳи. Бош мураббий-Наримон Асанов.
3- ўрин: “Қўқон терма жамоаси. Бош мураббий-Мирсаид Миролимов.
“Оқ-олтин”. Бош мураббий-Юнусали Мелибоев.

Айтганча, баъзи олий лига жамоаларининг ўртоқлик учрашувларида келмайдиган “тез ёрдам” машинаси бутун турнир давомида хизматга шай турганини алоҳида эътироф этиш жоиз.

Учрашувларни таниқли ҳакам Нодир Тошматов бошчилигидаги ҳакамлар бошқариб боришди.