Рўзиқул Бердиев: "Муҳим уч очкони қўлга киритдик"

"Мухлисларни ғалаба билан табриклайман. Бугун муҳим уч очкони қўлга киритдик. "Сўғдиёна" қарши ҳужумда ҳаракат қилди. Ўйин бизнинг устунлигимиз остида ўтди", - дея ўйин ҳақидаги фикрларини билдирди Рўзиқул Бердиев.

- "Сўғдиёна" жамоасини ўйини кучайганми?

- Бизларга келадиган барча жамоаларни ўйини тезда кучайиб қоладигандек. "Металлург" ҳам биз билан ўйинда енгил ҳаракат қилди. Умуман Қаршига келганда жамоалар юқори босимсиз ўйнайди. Балки шу боис уларнинг ўйини яхши чиқса керак.

- Мақсуд Каримов ярим ҳимоя чизиғида яхши ҳаракат қилмоқда. Сизга унинг ҳаракатлари маъқул келмоқдами?

- Мақсуд Каримов учун бу жой янгилик эмас. ОЧЛда ҳам Мақсуд Каримовни ярим ҳимоя чизиғида ўйнатгандик. Унинг хизматлари бизга кўп фойда келтирмоқда.

- "Насаф" бош менежери жамоа олдига чемпионликни бош вазифа қилиб қўйилганини айтиб ўтди. Бундан сизнинг хабарингиз борми?

- Ҳозиргина Шамил Ярулин кийиниш хонаси келиб ғалаба билан табриклади ва эрта-индин раҳбарият билан кўришишимизни айтди. Балки шунда бизга бу ҳақида хабар беришар. Барча масалалар учрашув чоғида гаплашиб олинса керак.

- Давралар оралиғида "Насаф" ҳужумчи оладими?

- Биринчи яхши ҳужумчи олиш учун катта имкониятга эга бўлиш керак. Бу ҳақида кўп айтилмоқда. Ҳозирча бу ҳақида бирор нарса дея олмайман. Шунингдек, таркибимизда Кенжа Тўраев, Азамат Алланиёзов бор. Улар жароҳатдан фориғ бўлиб боришмоқда. Уларни ҳали ўйнатишимиз керак.