"Реал" Марселони "Ювентус" футболчисига алмаштирмоқчи

Маълумотларга кўра, "қаймоқранглилар" ҳимоячиси Марсело Италияга йўл олиши, унинг ҳамюрти Алекс Сандро эса Испания клуби футболчисига айланиши мумкин. "Ювентус" узоқ вақтдан бери ўз футболчиси билан шартнома узайтириш борасида келиша олмаяпти. Алекс Сандро ва "кекса синьора" ўртасидаги битим 2020 йилнинг ёзида якунига етади. Марсело ўз навбатида олдинроқ "Ювентус"га ўтмоқчи эканлигини айтган эди.

Футболчиларни алмаштиришга "Қироллик клуби" қизиқиш билдирмоқда. "Реал" Марсело учун Алекс Сандро ва бир неча миллион евро олмоқчи. "Қаймоқранглилар" ўз футболчисини 60 млн еврога, Сандрони эса - 45 млн еврога баҳоламоқда. Бироқ футболчилар ёшини ҳисобга олсак (Марсело 30 ёш, Сандро 27 ёш), клублар ортиқча тўловларсиз ўйинчиларни алмаштириши мумкин.

Музокаралардаги энг катта муаммо футболчилар маошидаги фарқ бўлиши мумкин. Сандронинг йиллик маоши 2,8 млн евро, Марселоники эса 10 млн евродан кўпроқ.