Расман: Серхио Агуэро футболчилик фаолиятига якун ясади

"Барса" Youtube'даги расмий саҳифасида у иштирокида матбуот анжумани бўлиб ўтмоқда.

Аргентиналик бу қарорни юрагидаги муаммо сабаб қабул қилди. Агуэро кўз ёшларини тия олмади ва йиғлаб юборди.

"Бу матбуот анжумани шунчаки ўйинчилик фаолиятимни якунлашга қарор қилганим учун ташкил қилинди.

Бу жуда ҳам қийин пайтлар, аммо мен қабул қилган қароримдан мамнунман. Биринчидан, бу бир ой олдин мен тўқнаш келган соғлигимдаги муаммо. Гап соғлигим ҳақида кетмоқда", - дейди Агуэро.

Серхио 30 октябрда "Алавес" (1:1)га қарши ўйинни якунига етказа олмади ва ўшандан бери даволанмоқда. Аввалига ўйинчииннг тикланиши учун 3 ой кетиши маълум қилинганди, аммо кейинроқ муаммо жиддийроқлиги маълум бўлди.

Форвард "Барса" таркибида 5та ўйинда майдонга тушиб, 1та гол урди.

У клуб даражасида Европа Лигаси ва УЕФА Суперкубоги, беш бор Англия чемпиони, олти бор - Англия лига кубоги, бир бор Англия кубоги ва уч бор Англия суперкубогини қўлга киритди.

Агуэро Аргентина терма жамоаси таркибида Олимпиада-2008, шунингдек 2021 йилги Америка Кубогини қўлга киритган.

33 ёшли футболчи фаолияти давомида "Барселона"дан ташқари "Индепендьенте", "Атлетико" ва "Манчестер Сити" клублари шарафини ҳимоя қилган. Форвард 2006 йилдан бери Аргентина терма жамоаси шарафини ҳимоя қилаётган эди.