Расман: "Насаф" Жаба Жигаурини ўз сафига қўшиб олганини эълон қилди

Қаршининг "Насаф" клуби 31 ёшли грузиялик ярим ҳимоячи Жаба Жигаури билан шартнома имзолганини расман эълон қилди. 

Championat.asia сайти аввалроқ "Эшитдик-да!" рукни орқали Жаба Жигаурининг трансфери ҳақида маълумот берганди.

Жаба Жигаури фаолиятининг асосий қисмини мамлакатнинг икки гранд жамоалари - «Динамо» Тбилиси ва «Динамо» Батумида муваффақиятли ўтказган. Шунингдек, Жигаури фаолияти давомида Франция, Македония ва Қозоғистон лигаларида ҳам ўйнаган.

Жабанинг майдондаги асосий позицияси марказда бўлиб, футболчи марказий ва ҳужумчи ортида инсайд ролида ҳам ўйнаши мумкин. Жигаури ярим ҳимоячи бўлишига қарамасдан фаолияти давомида 86та гол уриб, 40 маротаба ассист қайд этган.

Жаба Жигаури Грузия миллий жамоаси аъзоси саналади ва термада 22та ўйин ўтказган.

Жаба Грузия футболининг ёрқин юлдузи Хвича Кварацхелия билан Батумида бирга тўп тепган.