Қувондиқ Рўзиев: “Бугун биз рақибга ҳар жабҳада мағлуб бўлдик”

Бугун Тошкентда меҳмон бўлган Бахтиёр Ашурматов шогирдлари пойтахт клубига муносиб қаршилик кўрсатган ҳолда ортларига кичик 0:1 ҳисобидаги мағлубият билан қайтишга мажбур бўлишди. Мазкур баҳсдан сўнг эса қўқонликларнинг етакчи футболчиси Қувондиқ Рўзиев фикрлари билан ўртоқлашди.

“Орадан уч ой ўтиб яна расмий учрашувларни ўтказишга рухсат беришди. Ўйлашимча, бу футболчилар учун жуда катта муддат. Лекин, бизга булар баҳона бўла олмайди. Биз бугун рақибга ҳар жабҳада мағлубиятга учрадик.

Ўйин давомида ҳужумга ўтишга бизда деярли имконият бўлмади. Чунки, “Бунёдкор” жамоаси тўпсиз қолдиришни уддасидан чиқди. Бунақа ҳавода тўпсиз ўйнаш катта куч талаб қилади. Аслида беллашувга бўлган режамиз бошқача эди. Кўрган бўлсангиз илк дақиқалардан иккита ҳужумчи билан ҳаракат қилишни бошладик. Аммо, ҳужумчиларни тўп билан таъминлаб бера олмадик. Бу менинг вазифам эди. Тўғриси, ўйинимдан қониқиш ҳосил қилмадим. Мураббийлар ва мухлислар кутгандек ўйнай олмадим. Кейинги учрашувларда ғалаба қозониб ишқибозларимизни хурсанд қилишга боримизни берамиз”,- дейди Қувондиқ Рўзиев.