Пляж футболи бўйича Жаҳон чемпионати. Япония ва Эрон кейинги босқичда

Маълумот учун, ушбу мундиалда 16та терма жамоа иштирок этяпти. Ўринлар қуйидагича тақсимланган:

Осиё (3та) - Эрон, Япония, Ўмон.
Европа (4та) - Беларусь, Италия, Португалия, Испания.
Африка (мезбон + 2та) - Сейшель ороллари, Мавритания, Сенегал.
Шимолий Америка (2та) - Эл Сальвадор, Гватемала.
Жанубий Америка (3та) - Бразилия, Парагвай, Чили.
Океания (1та) - Таити.

Ҳозирги пайтга келиб иккита гуруҳда учрашувлар тугади. A гуруҳидан Беларусь ва Япония, B гуруҳидан эса Португалия ва Эрон кейинги босқичга йўл олди.

Япония терма жамоаси гуруҳда Гватемалани 6:2, мезбон Сейшель оролларини эса 10:2 ҳисобида мағлуб этди, фақат Беларусь билан ўйинда 3:6 ҳисобида мағлуб бўлди.

Амалдаги Осиё чемпиони Эрон дастлаб Мавританиядан 5:4, сўнгра Парагвайдан 5:1 ҳисобида устун келиб, охирги турда Португалияга 5:7 ҳисобида имкониятни бой берди.

Бугун C ва D гуруҳларида 3-тур учрашувлари бўлиб ўтади. C гуруҳида Сенегал - Чили, Таити - Испания ҳамда D гуруҳида Эл Сальвадор - Италия, Ўмон - Бразилия учрашувлари ўтказилади.

8 май куни бўлиб ўтадиган чорак финалда Беларусь - Эрон, Португалия - Япония қарама-қаршилигини кўрамиз. Кейинги иккита жуфтлик бугунги баҳслардан сўнг маълум бўлади.

Эслатиб ўтамиз, пляж футболи бўйича Жаҳон чемпионатининг ҳал қилувчи финал баҳси 11 майга белгиланган. Яна бир маълумот, ўйинлар Adidas CNXT25 PRO тўпларида ўйналяпти.

Бу ҳисоб бўйича 13-марта ўтказилаётган Жаҳон чемпионати. Аввалги мундиалда Бразилия ғолибликни қўлга киритган.

Х.Холиқов.