Осиё Кубоги-2019. "E" гуруҳи мураббийлари

Қуйида "E" гуруҳи терма жамоалари бош мураббийлари ҳақида қисқача маълумот берамиз.

"E" гуруҳи - Саудия Арабистони, Қатар, Ливан, КХДР.

Хуан Антонио Пицци (С.Арабистони бош мураббийи)
Туғилган санаси: 7 июнь, 1968 й.

Яқин бир йилдан бери Хуан Антонио Пицци саудияликлар бош мураббийи ҳисобланади. Унинг қўл остида жамоа ЖЧ-2018да муваффақиятли иштирок эта олмади. Айниқса руслардан учралган 0:5 ҳисобидаги мағлубият жуда қаттиқ зарба бўлди. Эндиликда 50 ёшли мураббий билан Саудия Арабистони Осиё Кубогида ғолиб чиқишга ҳаракат қилиб кўради.

Феликс Санчес (Қатар бош мураббийи)
Туғилган санаси: 13 декабрь, 1975 й.

43 ёшли мураббий 2006 йилдан бери Қатарда ишлаб келяпти. У аввалига Қатар U-19 ёшлар терма жамоасини бошқариб, 2014 йил ўтказилган U-19 мусобақасида ғолиб чиқди. Шу йил қишда ўтказилган U-23 Осиё чемпионатида эса бронза медалларини қўлга киритди. Ҳозирда испаниялик мураббий миллий терма жамоани бошқармоқда.

Миодраг Радулович (Ливан бош мураббийи)
Туғилган санаси: 23 октябрь, 1967 й.

Радуловични мухлислар "Пахтакор"даги фаолияти орқали яхши билишади. Эндиликда 51 ёшли черногориялик мутахассис Ливан терма жамоасини бошқармоқда. У 2015 йил ушбу жамоани қабул қилиб олганди.

Ким Ёнг Жун (КХДР бош мураббийи)
Туғилган санаси: 19 июль, 1983 й.

Кетма-кет учинчи марта Осиё Кубогида иштирок этадиган КХДР термасининг устози маҳаллий мураббий ҳисобланади. Яқинда футболчилик фаолиятини тугатган 35 ёшли Ким Ёнг Жун терма жамоага бош мураббий этиб тайинланди. Ушбу мураббий қўл остида шимолий кореяликлар плей-оффга чиқишга ҳаракат қилиб кўришади.