"Оқ-тепа" - "Шердор". Учрашувидан кейинги фикрлар

Александр Токов ("Оқ-тепа" бош мураббийи): - Бугун ҳам аввалги беллашувларда бўлгани каби рақиб дарвозасини ишғол қилиш учун жуда кўп имкониятларга эга бўлдик. Агар футболчиларим яратилган вазиятлардан фойдаланишганида ўйин тақдирини назарий жиҳатдан танаффусга қадар ҳал қилган бўлардик. Аммо ҳар доимги “касаллик” яна панд берди.

Иккинчи бўлим ҳам биз учун ёмон бошланмаганди. Ҳатто иккинчи голни ҳам ургандик, бироқ қанот ҳаками Аҳмаджоновни “офсайд”дан гол урди деб ҳисоблади. Очиғи, ҳакамнинг бу қарорига тушунмадим. Ҳужумларимиз голга айланавермагач, йигитлар диққатни йўқотиб қўйишди. Айниқса, ҳимоячилар ўзларига ўхшамай қолишди. Натижада бутун ўйин давомида икки марта жиддий хавфли ҳужум ташкил қилган меҳмонлар ғалабани илиб кетишди.

Сайфулла Шарипов ("Шердор" бош мураббийи): – “Андижон”га қарши ўйиндаги мағлубиятдан кейин “Оқ-тепа” билан бўладиган баҳсга жиддий тайёргарлик кўрдик. Рақибнинг ўйинини ўрганиб чиқиб, шунга мос равишда тайёрландик. Гарчи бугунги беллашувга айни учрашув арафасида етиб келган бўлсак-да, бу бизга салбий таъсир қилгани йўқ.

Бугун майдон эгаларига муносиб қаршилик кўрсатдик. Биринчи бўлимда ўз дарвозамиздан битта тўп олиб чиқдик. Танаффусда шогирдларимга ўз ўйинларини кўрсатишларини таъкидладим, қолаверса, ҳужумлар сонини оширишларини ҳам сўрадим. Бу якунда ўз самарасини бериб, биз ажойиб ва муҳим ғалабага эришдик.