ОЧЛ-2021. Зоран Янкович: "Илк турда бир очко ишладик. Энди навбатдаги даражага чиқишимиз керак"

"Нафақат биринчи балки асосий жамоамиз учун ҳам "Кавасаки Фронтале"га қарши ўйнаш осон бўлмасди. Таркибда бор йигитлар билан эртага яхши ўйин кўрсатишга, футбол ўйнашга ҳаракат қиламиз. Ушбу турнирдаги иштирок ёш футболчиларимиз учун тажриба ва маҳоратини оширишга хизмат қилади. Бундай имконият тақдим этилганидан мамнунмиз",- дейди Зоран Янкович.

- Ёш футболчиларни кучли рақибларга қарши тайёрлаш қандай бўляпти?

- Бундай учрашувларга уларни ҳозирлаш ҳар қандай мураббий учун қийинчилик туғдириши табиий. Биз бу борада ҳаракат қиламиз. Яна бир жиҳатни айтиб ўтишим керакки, рақиб кучли жамоа. Бироқ биз биринчи баҳсда нималарга қодирлигимизни кўрсатдик. Иккинчи ўйинда янада яхшироқ ўйин кўрсатишни мақсад қилганмиз. Ёш футболчилар диққатни жамлаши осонмас. Уларни ҳали боладек, десам ҳам бўлади. Уларни руҳан тайёрлашга урғу қаратмоқдамиз. 

- Савол футболчига. Жамоада ёшлар кўп, лекин улар орасида сизга ўхшаган тажрибали ижрочилар ҳам йўқ эмас. Эртага масъулият сизнинг зиммангизга тушиши мумкин. Бунга тайёрмисиз?

- Елкамда катта масъулият борлигини ҳис қилиб турибман. Ёш йигитларга қўлдан келганча ёрдам беришга ҳаракат қиламан. Мураббийнинг кўрсатмаларини эслатиб бораман. 

- "Кавасаки Фронтале" кучли рақиб. Айниқса топ даражадаги футболчиларга эга. Уларга қарши қандай қурол билан майдонга чиқмоқчисиз?

- Мусобақадан олдин бу жамоа ҳеч бўлмаганда гол ура олармикин, деган фикрлар янграганди. Дастабки учрашувда қўлимиздан нималар келишини кўрсатдик. Рақиб дарвозасини ишғол қилишга ҳам эришдик. Бундан ҳам кўпроқ нарсага қодирлигимизни намойиш қилмоқчимиз. 

- Илк баҳсда бир очко қўлга киритилди.  Жамоа навбатдаги ўйинларни балки тўлиқ ўз фойдасига ҳал қилиши мумкинми? Шунингдек биринчи турда жамоа сўнгги дақиқаларда темпини тушириб юборди. Буни қандай бартараф этмоқчисиз?

- Тўғри бир очко қўлга киритдик. Энди юқорида айтганимдек навбатдаги даражага чиқишимиз керак бўлади. Бу сафар ўтган ўйиндаги каби ҳамма нарсани уддалай олсак мақсадимизга етган бўламиз. Балки ўйинни охирига бориб футболчиларни бўшашгани уларнинг ёшлиги билан боғлаш мумкин. Жисмоний томондан тўлиқ тайёрмиз. Қолган жиҳатларни секин-аста ишлаб борамиз.