Никола Лазаревич: "Рақибимизда мураббий алмашгач, ўйин услуби ўзгариб жамоа иккита ўйинда 12 та гол уришга эришди"

-"Пахтакор"ни ғалаба билан табриклайман. Биз қийин ўйин бўлиши билардик. Рақибимизда мураббий алмашгач, ўйин услуби ўзгариб жамоа иккита ўйинда 12 та гол уришга эришди.  Биз уларнинг ўйинини ўрганиб чиққандик. Жамоа бугун ҳам аввалги ўйинлар сингари ҳужумкорликни давом эттиришини кутгандик.  Биз ҳам ўз навбатида рақибга кутилмаган "сюприз" қилишни режалаштиргандик. Биринчи бўлимда яхши ҳаракат қилдик. Вазиятларни яратдик. Аммо гол ура олмадик. Иккинчи бўлимда эса ўйин охирида рақиб яна иккита гол уриб, йирик ғалабага эришди.

Умуман бугун стадионда ажойиб атмосфера ҳукмрон эди. Рақиб вазиятлардан самарали фойдаланди. Биз эса...

-Жуманқўзиев яхши ўйнаб турганди. Уни захирага олишингизга сабаб нима эди?

-Ҳа, у яхши ўйин ўтказди. Аммо мураббийлар штаби шундай қарорга келдик. Унда сариқ карточка бор эди ва шундан кейин ҳам иккита вазиятда рақибга қўполлик ишлатди ва ҳакам яна уни огоҳлантириб, майдондан четлатиши ҳам мумкин эди. Шу сабаб уни захирага олишга мажбур бўлдик. 

-Бугун Ваҳобов ва Диёр Раҳматиллоев қайдномадан ҳам жой олишмади. Уларнинг жароҳатлари қанчалик жиддий?

-Ваҳобов ўтган турда "Машъал"га қарши ўйинда жароҳат олганди. Умид қиламизки, у кейинги ўйинда сафимизда бўлади. Диёр эса кеча машғулотлар чоғида жиддий жароҳат олди. Биз уни бугун майдонга туширишга тайёр эдик. Афсуски, кечаги машғулотдан олган жароҳати боис у маълум вақт бизга ёрдам бера олмайди.