“Нефтчи” янги йил тадбирини ўтказди

Хусусан “Нефтчи” клуби ҳам куни кеча янги йил байрамини ўтказди. Пайшанба куни Фарғона шаҳридаги “Мираж” кафесида футболчилар, клубнинг ҳисобчи, ошпаз ва жамики ишчи ходимлари шарафига байрам дастурхони ёзилди.



Шунингдек кечага бир қатор меҳмонлар таклиф этилди. Хусусан Фарғона нефтни қайта ишлаб чиқариш заводининг директор ўринбосари Шуҳрат Султонович, Фарғона вилояти футбол федерацияси вице-президенти Салимжон Зокиров, “Истиқлол” стадиони директори Илҳомжон Собитов, каби бир қатор таниқли кишилар тадбирга ташриф буюрди.



Янги йил байрами бошланиши олдидан “Нефтчи” клуби раиси Тоҳир Кападзе сўзга чиқиб, йиғилганларни кириб келаётган янги 2015 йил билан самимий қутлади. Шунингдек бир қатор мартабали кишилар сўзга чиқиб, байрам арафаси табрикларини йўллади.



Фарғона футболида ўзига яраша хурмат қозонган Лев Вахтин, Аркадий Пишук ҳамда Валерий Седунов каби фахрийлар ҳам чиқиш қилиб, дилсўзларини билдирди.

Шундан сўнг футболчилар саҳнага таклиф этилиб, мусиқа ва рақслар ташкил этилди.

Шу тариқа янги йил тадбири ўз поёнига етди.