"Миржалол Қосимовнинг таклифидан сўнг ўйлаб ўтирмай АГМКга ўтдим" - Анзур Исмоилов

Бугунги машғулот Белекдаги "Calista sport center" майдонида олиб борилди. Биз эса машқлар якунига етгач жамоанинг янги футболчиси Анзур Исмоиловнинг фикрларига қулоқ тутдик. 

Ҳимоячи "Пахтакор"дан кетиши ва нима учун АГМКни танлагани ҳақида дастлаб қуйидагича фикр билдирди.

 - "Пахтакор" таркибни ёшартирмоқда. Бир томондан уларни ҳам тўғри тушуниш мумкин. Шу паллада АГМК жамоаси бош мураббийи Миржалол Қосимов таклиф билан чиқдилар. Улар жамоага керак эканлигимни айтдилар. Шунинг учун ўйламасдан бу жамоани танладим. 

Анзур Исмоилов билан қисқа суҳбат жараёнида бевосита хорижда олиб борилаётган йиғин ҳақида ҳам сўрадик. Унинг фикрича янги футболчилар ўзаро чиқишиб олиши учун ҳам бундай йиғинлар фойдали. 

- Қишки ўқув-машғулот йиғинларини асосий қисмини хорижда ўтказмоқдамиз. Бундан аввал Дубайда "Жабел Али" спорт мажмуасида шуғулландик. Ўртоқлик учрашувида майдонга иштирок этдик. Мана шундай йиғинлар орқали бир-биримизни яхши билиб олишимиз талаб қилинади. Қайсидир маънода биз учун бир имконият десам ҳам нотўғри бўлмайди. Шу жиҳатдан ҳам фойдаси бор. Яна бир томони бунда бир нечта хориж жамоалари билан ўйнаймиз. Қанчалик кучли рақиблар билан ўйнасак, чемпионатда шунча осон кечади. 

Интервью якунида тажрибали тўп тепар ёш футболчиларга ва энди етишиб чиқаётган ҳимоя чизиғи вакилларига маслаҳатларини бериб ўтди. 

- Машғулотларда астойдил шуғулланиш шарт. Бунга юзаки ёндашиш нотўғри. Тўхтамасдан  устиларида ишлашлари керак. Мен ҳам ўз вақтида Асрор Алиқулов, Бахтиёр Ашурматов, Хайрулла Каримов каби тажрибали футболчилардан кўп нарса ўрганганман. Бугунги ёш футболчилар ўзларидан катталардан ўрнак олишса ўсишга эришишади.

Абдулазиз  Искандаров ёзиб олди