“Металлург” яна бир футболчи билан шартнома имзолади

 Бекободликлар яна бир иқтидорли ўйинчи билан келишувга эришдилар. Тошкент вилоятининг АГМК жамоаси билан хайрлашган Музаффар Музаффаров учинчи йиғиндан эътиборан бекободликлар сафига келиб қўшилган эди. Тиббий кўрикдан кейин куни кеча клуб ва футболчи ўртасида шартнома расмийлаштирилди.

Музаффар Музаффаров 1995 йилнинг 12 апрель санасида таваллуд топган. 23 ёшда. Амплуаси ярим ҳимоячи. 2014 йилдан буён кучлилар сафида тўп суриб келмоқда. Биринчи мавсумни Фарғонанинг “Нефтчи” жамоасида ўтказган Музаффар 2015-16 йилларда "Сўғдиёна", 2017 йилда "Нефтчи", 2018 йилда эса АГМК жамоасида фаолият юритди. Шу йиллар давомида Музаффаров 96 учрашувда майдонга чиқиб, рақиблар дарвозасига 13 та гол киритди. 19 марта огоҳлантирилди. 3 марта эса иккиталик сариқ карточкалар туфайли майдондан четлатилган. Биз Музаффарга "Металлург" таркибига хуш келибсан, омад ёр бўлсин деймиз!

Муқаддам, "Металлург" таркибга Сервер Жепаров, Камолиддин Тожиев, Шавкат Муллажоновларни қўшиб олганди. Шунингдек, бу мавсумдан эътиборан собиқ пахтакорчилар Акбар Исматуллаев, Аббос Отахонов ҳамда Станислав Андреев ҳам “Металлург” жамоаси шарафини тўлақонли аъзолар сифатида ҳимоя этишади.