Конфедерациялар кубоги чемпиони - Бразилия!

Жаҳон ва Европа чемпионлари ЖЧ-2014 мундиал мезбонларидан жавобсиз учта гол ўтказиб юборишди.

Бразилия терма жамоаси Конфедерациялар кубоги финалида Испанияни йирик ҳисобда мағлуб этди.

Якшанба куни тунда Рио-де-Жанейродаги "Маракана" стадионида бўлиб ўтган ўйин 3:0 ҳисобида якунланди. Ғолиб жамоа сафида Фред дублга эришди (2 ва 47-дақиқа), яна бир голни Неймар (44-дақиқа) урди. Серхио Рамос пенальтидан ҳисобни қисқартириши мумкин эди, аммо 55-дақиқада ҳимоячи 11 метрли зарбани ноаниқ амалга оширди. 68-дақиқада Пике қизил карточка олгач испанлар 10 киши бўлиб қолишди.

Бразилия терма жамоаси Конфедерациялар кубогида тўртинчи (кетма-кет учинчи бор) марта ғолиб чиқди. Италия терма жамоаси эса пенальтилар сериясида Уругвайни таслим қилиб мусобақада учинчи ўринни эгаллади.
 
Финал
 
Бразилия – Испания 3:0 (2:0, 1:0)
1 июль, 02.00, «Маракана (Марио Фильо)»
Голлар: 1:0 – 2 Фред, 2:0 – 44 Неймар, 3:0 – 47 Фред.
Амалга оширилмаган пенальти: Серхио Рамос (55, Испания)
Бразилия – Жулио Сезар, Дани Алвес, Давид Луиз, Силва, Марсело, Л. Густаво, Оскар, Паулиньо (Эрнанес, 88), Халк (Жадсон, 73), Неймар, Фред (Жо, 80).
Испания –  Касильяс, Арбелоа (Аспиликуэта, 46), Рамос, Пике, Альба, Бускетс, Хави, Иньеста, Мата (Навас, 52), Педро, Торрес (Вилья, 59).
Огоҳлантиришлар: Арбелоа (15), Рамос (28).
Четлаштиш: Пике (68)