“Ифтихор” вакиллари мактаб ўқувчилари билан учрашишди

Ўзбекистон ёшлар иттифоқи васийлигидаги “Ифтихор” жамоаси жисмонан соғлом, маънан етук ва интеллектуал ривожланган, мустақил фикрлайдиган ёш авлодни шакллантириш уларга ҳар томонлама кўмаклашиш ва шарт-шароитларни яратишни мақсад қилган ҳолда фаолият юритаётганидан хабарингиз бор.

Бундан ташқари, жамоанинг яна бир устувор вазифаларидан бири чекка қишлоқлардаги иқтидорли ёш футболчиларни излаб топиш ва уларни етук футболчи бўлишига кўмаклашдан иборат.

Бугун Ўзбекистон ёшлар иттифоқи васийлигидаги “Ифтихор” жамоаси вакиллари Риштон туманида жойлашган 11- ва 27-умумий ўрта таълим мактабига ташриф буюриб, ушбу таълим даргоҳларда таҳсил олаётган ўқувчилар билан учрашишди.

Учрашув давомида “Ифтихор” вакиллари мактаб ўқувчиларига мастер-класс ўтаб беришди. Шунингдек, ўзбек футболи юлдузларидан бири бўлган Ғайрат Ҳасанов сўзга чиқиб ёшларга ватанпарвар руҳи хусусида айтиб ўтди.

Айтганча, қизиқарли руҳда бўлиб ўтган учрашувда Риштон туманида истиқомат қилаётган фархий футболчиси Ўринбой Юсупов ҳам қатнашиб болаларга спортнинг аҳамияти, унинг инсон ҳаётидаги роли хусусида сўзлаб берди.

Бир сўз билан айтганда, Ўзбекистон ёшлар иттифоқи васийлигидаги “Ифтихор” жамоаси томонидан ташкил этилган учрашув барчада катта таассурот қолдирди.

“Ифтихор” жамоаси бу билан тўхтаб қолмоқчи эмас. Яна шундай учрашувлар ўтказишга режалаштирилган.