Ҳамиджон Актамов: “Бухоро” билан учрашув қийин ўтишини аввалдан билардик”

— Бугун ўйин қийин ўтишини олдиндан билардик, — дея сўз бошлади Ҳамиджон Ғуломович. — “Бухоро” кучлилар сафида ўз ўрнини сақлаб қолиш учун курашаётган жамоа. Улар учун ҳар бир ўйин финалга тенг,  десам янглишмайман. Жамоамиз эса Қўқонда ўтган охирги баҳсда қимматли очколарни қўлдан чиқарган ва бугун мухлисларни ўз ғалабамиз билан қувонтиришимиз шарт эди.  Шу боис, учрашувга пухта тайёргарлик кўрдик.

“Бухоро” жамоасига қарши ўйин олдидан ҳимоя чизиғимизда муаммолар бор эди. Тажрибали ҳимоячилар Асқаржон Муҳиддинов жароҳати, грузиялик легионер Георгий Квесиешвили эса сариқ карточкалари сони тўрттага етганлиги туфайли бугун майдонга туша олишмади. Шунга қарамай, жамоамиз аъзолари фақат ғалаба илинжида майдонга чиқди ва уларнинг йўқлигини билинтиришмади. Футболчиларимиз кўрсатмаларимизни тўғри амалга ошира олдилар. Мухлисларимизни ғалаба билан табриклайман.

Бугун йирикроқ ҳисобда ғалаба қозонишимиз ҳам мумкин эди. Ваҳобов, Алимов, Деркачда голга тортадиган бир неча қулай вазиятлар юзага келди. Аммо бухороликлар посбони чинакам маҳорат кўрсатганлигига барчангиз гувоҳ бўлдингиз.

Чемпионат охирлагани сайин учрашувлар янада шиддатли тус олмоқда. Мавсумни жамоамиз олдинги йиллардагига қараганда, юқори ўринларда тугатишни ўз олдига мақсад қилиб қўйган. Ишонаманки, албатта бунинг уддасидан чиқамиз.