Ҳаким Фузайлов: "Сурхон" ўз имкониятларидан унумли фойдаланиб кетди"

Ўйин ҳақида

- "Сурхон" жамоасини ярим финалга чиққанлиги билан табриклайман. Натижа адолатли бўлди. Жамоамиз ёмон ўйин кўрсатмади. Бироқ, юзага келган вазиятларни голга айлантиришда бироз аниқлик етишмади. Аксинча, "Сурхон" жамоаси ўз имкониятларидан унумли фойдаланиб кетди. 

- Чемпионатнинг ортда қолган қисми ҳақида нималарни айта оласиз?

- Жамоамизда аксарият футболчилар ёш. Улар тўлиқ ўзларини кўрсата олишлари учун вақт керак, мослашув жараёни бор. Босқичма-босқич кучайиб борамиз.

- Клуб раҳбарияти жамоа олдига қандай вазифа қўйган?

- Раҳбарият бизга юқори мақсадлар учун курашиш вазифасини қўйган. Ҳаракат қиламиз, барчамиз шуни истаймиз, мавсум якунида "Хоразм"ни Суперлига йўлланмасига эга чиқиши учун курашамиз. Бизни доимий қўллаб-қувватлаб келаётган мухлисларимиз бор, улар ҳам ҳар бир ўйинда ғалаба қозонишимизни исташади.

- Трансферлардан қониқиш ҳосил қилдингизми?

- Трансферлар борасида айтсам, ёмонмас, фақат белгиланган лимитга амал қилиш керак. Трансферларни айнан Регламентда кўрсатилган талаблардан четга чиқмаган ҳолда амалга оширдик.

- Жамоангиз бугун ёмон ўйин кўрсатмади. Агар шу каби ўйинларини Про-лигада ҳам давом эттирса, Суперлига йўлланмасига эга чиқади. Бу борада фикрингиз қандай?

- Тўғри, бугун ёмон ўйнаганимиз йўқ. Таркибимизнинг аксарият қисмини ёш футболчилар ташкил этади. Албатта, биз Про-лигада ҳам яхши ўйин намойиш этиб, Хоразм вилоятига катта футболни қайтармоқчимиз.