Ҳафта иқтибослари. Неймар, Месси, Усейн Болт, Усмон Дембеле ва бошқалардан энг сара фикрлар

- "Ҳаётда кимнидир йўқотиш оғир. Мен ёшлигимда уни ТВ орқали кўп бор эшитганман ва кўрганман. У жаҳон чемпионати баҳсларини ажойиб шарҳларди. У футболнинг ҳақиқий овози эди. Мен унинг овозидан таъсирланиб футболга кириб келганман дея оламан" (Тим Кэйхилл 71 ёшида оламдан ўтган австралиялик афсонавий шарҳловчи Лес Мюррей ҳақида)

- "Бу осон бўлмади. Мен кўп ўйладим ва якунда ҳаётимда ниманидир ўзгартиришим керак деган қарорга келдим. То бир фикрга келмагунга одамлар билан бу ҳақда гаплашмадим, фақат якуний қарордан сўнггина ўз фикрларим билан ўртоқлашдим. Мен юрагимга қулоқ солганимда, у менга Парижга бор деди". (Неймарнинг "Барселона"дан ПСЖга ўтгач матбуот анжуманида айтган гапи)

- "Неймар билан бирга ўтказган йилларимдан хурсандман, у ҳақиқий ўртоқ. Мен унга фаолиятининг янги босқичида омад тилаб қоламан. Сени кўп яхши кўраман". (Мессиннинг Неймарга атаб ёзган хайрлашув сўзлари)

- "Барса"да нимага эришган бўлсанг, бу бир умр тарихда қолади. Сенга ўхшаган футболчилар клубни буюк қилишади". (Пикенинг Неймар ҳақида айтган охирги гапи) 

- "Мен "Лос Анжелес"нинг кейинги 33 ўйинида энг катта мухлисига айланаман. Мен "Торонто"ни севаман, "Торонто" - менинг уйим ва бу ердан ҳеч қаёққа кетмайман. Аммо энди отам учун ҳам "Лос Анжелес"га мухлислик қиламан". ("Торонто" сардори Майкл Бредли отаси Боб Бредли "Лос Анжелес" бош мураббийи этиб тайинланганидан сўнг)

- "Мен ҳар доим футбол ҳақида гапиряпман ва Моуриньодан қўнғироқ бўлишини кутяпман. Бу умрбод давом этиши ҳам мумкин. Лекин менимча, Моуриньо охирги кунгача кутади ва шундан кейин қўнғироқ қилади" (Ямайкалик машҳур спринтер Усейн Болт МЮ сафига қўшилиш учун Жозе Моуриньодан ҳамон таклиф кутаётгани ҳақида)

- "У "Боруссия Дорутмунд"даги энг муҳим ўйинчи. Ҳар қандай футболчининг ўрнини тўлдириш мумкин, лекин гап Обамеянг ҳақида борар экан ўйлаб қоласан. Жамоанинг 20 фоиз ўйини айнан унга боғлиқ" ("Боруссия" Д собиқ бош мураббийи Оттмар Хитцфельднинг Пьер-Эмерик Обамеянг ҳақида фикри)

- "Ҳеч қачон бўш келма! Хоҳ ҳаётда, хоҳ спортда. Орзуларинг рўёбга чиқишидан асло воз кечма. Нимагадир эришишни хоҳласанг, бунга албатта эришасан" (Аёллар футболи бўйича Европа чемпионати тўпурари Жоди Тэйлорнинг матбуотга берган интервьюсидан)

- "Юрген Клопп футболчилардан нима хоҳлашни билади. Агар биз тўпни йўқотсак биринчи қилинадиган иш йўқотилган тўпга қараб бориш, орқага қайтиб тўпсиз ҳимояланиш эмас. Биз яхши ҳимояланамиз ва жамоада ҳимоя ҳужумдан бошланади. Клопп кучли мураббий, у тўғрисўз, шу билан бирга ҳамма ишни юракдан бажаради". ("Ливерпуль" ҳимоячиси Жоел Матипнинг бош мураббий Юрган Клопп ҳақида айтган фикри)

- "Менда иккита машина бор, лекин ҳайдовчилик гувоҳномам йўқ. Ҳозирда тоғам мени Дортмунд кўчалари бўйлаб сайр қилдиради. Мен гувоҳномани Францияда олсам керак". ("Боруссия" футболчиси Усмон Дембеле ҳали машина ҳайдай олмаслиги ҳақида)

Х.Холиқов тайёрлади.