Футзал. Рустам Умаров: "Охиригача курашамиз"

Эслатиб ўтамиз, 11 сентябрь куни Ўзбекистон терма жамоаси Панама билан ўйинда имкониятни бой бериб қўйди (1:3).

«Биз Жаҳон чемпионатидаги биринчи ўйинимизда Панамани мағлуб этишни истагандик. Шу боис барча бор кучи билан ўйнади. Тезроқ гол уришни ўйладик. Балки шошилганимиз бизга халал бергандир. Якунда ўзимиз қилган хатолар туфайли ютқазиб қўйдик», - дейди 32 ёшли дарвозабон.

«Олдинда бизни қанчалик кучли рақиблар кутиб турганини ҳис этаяпмиз. Колумбия – ўтган мундиал ярим финалчиси. Бунга қўшимча равишда улар мундиал мезбони. Португалия – Европанинг энг кучли жамоаларидан бири. Бу жамоа таркибида Рикардиньо ва Кардинал каби футзалчилар ўйнашади. Илк турда бу икки жамоа ўртасидаги баҳс юқори савияда ўтди. Бироқ, Колумбияга келишимиздан аввал кимга қарши ўйнашимизни билардик. Бу Жаҳон чемпионати, бу ерда кучсиз жамоалар йўқ. Шу боис кейинги икки ўйинда янада кучли ўйнаб Ўзбекистон терма жамоаси ҳисобига очко қўшмоқчимиз. Кимга қарши ўйнашимиздан қатъий назар охиригача курашамиз», - дейди Умаров.