Футзал, аёллар ва U18 жамоаларига беэътибор Суперлига клублари жазоланади

Бу талабларни бажариш, албатта, осон эмас. Аммо Pepsi Суперлига клублари мавсум аввалидаёқ буни билган ва шу ишларни бажариш кафолатини берган. Шунга қарамай, айрим жамоалар футзалчиларга ёки энг кичик ёш жамоаларга эътиборни сусайтириб юборган. Бу борада ПФЛ шикоятлар қабул қилиб турибди.

Шундан келиб чиқиб, Профессионал футбол лигаси Суперлига клубларини расман огоҳлантиради. Шакли жиҳатидан бошқа-бошқа бўлишига қарамай, аёллар футболи ва футзал жамоалари ҳам клубнинг тенг ҳуқуқли аъзосидир. Шу қоида кимнингдир ёдидан кўтарилган бўлса, ўша жамоа жазога тортилади.

Айни вақтда бир қатор клубларда молиявий муаммолар борлигидан ПФЛ хабардор. Молиявий масалалар гирдобида қолган жамоалар муаммосига ечим топиш учун ЎФА раҳбарияти ҳам жиддий ҳаракат қилмоқда. Футбол клубларининг ривожланиши ва шу йўл орқали мамлакат футболида ўсиш бўлишидан барчамиз манфаатдормиз.

Ўз навбатида клублар раҳбарияти ҳам қўл қовуштириб ўтириши керак эмас. Футболдаги ислоҳотлар даврида ҳеч кимга осон бўлаётгани йўқ. Шундай экан, жангсиз таслим бўлиш ярашмайди. Клублар ўзида бор муаммолар, ечим топмаётган масалалар юзасидан жиддий иш олиб борсин, ОАВ билан ишласин ва ҳоказо. Бизнинг муаммоларимизни ташқаридан кимдир келиб ҳал қилиб бермайди.

ПФЛ талаби эса ўзгармайди. Pepsi Суперлигаси клублари асосий таркиб футболчиларига қандай эътибор қаратса, қолганлар ҳам шундай эътиборда бўлиши лозим. Ўз навбатида Про-Лига клублари ҳам ҳозирданоқ бу каби талаблар ҳақида бош қотириши шарт. Зеро бу талабларга жавоб бера олмайдиган клублар барибир Суперлигага қўйилмайди.

P.S. Хабар матни клубларга алоҳида-алоҳида жўнатилди. Бундан буён клубдаги қолган жамоалар ҳам назорат қилинади. Улардаги муаммолар учун клуб раҳбарияти жавоб беради.