Фарҳод Нишонов: "Кубок ўйинларида янада узоқроқ боришни мақсад қилгандик"

- Ўйин ҳақида фикрингиз?

- "Пахтакор"ни кейинги босқичга чиққани билан табриклайман. Бугун биз яхши ва кучли жамоага қарши ўйнадик. "Пахтакор" маҳорат бобида устун эканини кўрсатди ва ғалаба қозониб кейинги босқичга йўл олди.

- Жамоангизнинг Кубокдаги иштирокини қониқарли баҳоласа бўладими?

- Тўғрисини айтсам, Кубок ўйинларида янада узоқроқ боришни мақсад қилгандик. Нимчорак финалда "Пахтакор" бизга рақиб бўлгани ҳам ўз ниятимиздан қайтармаганди. Тўғри, "Патакор" кучли, лекин биз ҳам ўз футболчиларимизга ишонгандик. Жамоамиз кучли рақибга қарши қўрқмай тенгма-тенг ўйнади, мени шу хурсанд қилди.

- Ҳакамлик ҳақида нима дея оласиз? Учрашув охирларида баҳсли пенальти вазияти юзага келди, қолаверса жамоангиз томонидан киритилган гол инобатга олинмади.

- Менда ҳали такрорий вазиятларни кўриб чиқиш учун вақт бўлмади. Бугунги баҳсда VAR ишлади, ҳакамлар VARга мурожаат этишди, қарор қабул қилишди. Бу саволларни Ҳакамлар қўмитасига қолдирган маъқул, чунки бу бизнинг ишимиз эмас. Шу ўринда ҳакамларга эътирозим: ўйинда тўхталиш кўп бўлди, лекин ҳакамлар кам вақт қўшди.

- Клуб бош ҳомийси "MobiUz" компанияси сотувга қўйилгани жамоага ўз таъсирини кўрсатяптими?

- Йўқ, бу ҳақда энди сиздан эшитдим. Жамоадаги ҳамма ишлашда давом этяпти. Бу ҳам Олимпиада учун лойиҳанинг бир қисми, шу боис маблағ томонлама муаммо кўрмаяпман.

- Жамоангизда яққол етакчи йўқлиги сезилди. Балки тажрибали ёш катта бир-икки нафар ўйинчини қўшиб олган маъқулдир?

- Тўғри, тажрибали футболчилар бўлса яхши. Лекин биз навбатдаги Олимпия ўйинлари йўлидаги лойиҳа бўлганимиз учун ўз йўлимизни ўзгартира олмаймиз. Аввалги "Олимпик" ҳам ёшлардан иборат эди ва улар вазифани бажаришди. Биз ҳам шунга ҳаракат қиламиз.

- "Олимпик-MobiUz" Пролигада пешқадамлик қилмоқда. Суперлигага чиқиш йўлида жамоангиз қийналиб қолмайдими?

- Таркибимизга яна икки-уч нафар яхши футболчи керак. Лекин қийналиб қоламиз деб ўйламайман. Футболчилардан кўнглим тўқ, ҳамма астойдил меҳнат қиляпти. Фақат вазиятларни голга айлантириш борасида янада кўпроқ ишлашимиз керак.