Дракслер: "Европа чемпионатида нималарга қодир эканлигимни исботлашим лозим"

- Ўтган мавсумнинг ҳал қилувчи палласида жароҳат олганим мени тушкун ҳолатга солиб қўйганди. Европа чемпионатига қадар тикланиш учун бор ҳаракатни амалга оширдим. Европа чемпионатига келиш учун кечаси билан тинмай меҳнат қилдим. Бу меҳнатларим эса ўз самарасини берди. Мен терма жамоадаги ёшларга маслаҳат бераманми? Менимча, бизнинг барча футболчиларимизнинг кучли жиҳатлари кўп. Уларга мени маслаҳатим шарт эмас. Мен ҳали ўз ўйинимга эътибор қаратишим керак. Ўйлашимча, яхши спорт формага кириб боряпман. Франциядаги катта турнирда ўзимни кўрсатишга ҳаракат қиламан.
Охирги ўртоқлик учрашувларида ўзимни яхши томонлама кўрсата олдим, деб ўйлайман. Қолганини мураббий ҳал этади. Жамоамиз ғалабаларга ташна, совринларга чанқоқ. Биз йирик мусобақалардаги ғалаба таъмини биламиз. Буни кўпчилик икки йил аввал ҳис этган. Яна ўша муваффақиятни Европа чемпионатида ҳам такрорлашни истаймиз. Тайёргарлик босқичлари тугади. Энди ниҳоят ҳал қилувчи ўйинларда майдонга чиқишимиз мумкин.
Украина билан ўйин қийин кечиши табиий. Ушбу рақиб охиригача курашадиган жамоалар сирасига киради. Лекин Германия ҳар қандай қаршиликларга тайёр. Барчаси ўзимизга боғлиқ.

Европа чемпионати ўзгача мусобақа. Ҳар бир ўйин катта завқ улашиши мумкин. Шу боисдан ҳам имкон кўпроқ ўйинларни томоша қилишга ҳаракат қиламан. Қизиқарли ўйинлар жуда кўп бўлади.