Дониёр Исмоилов: "Иккинчи бўлимда ўйинимизни кучайтириш ҳисобига ғалаба қозондик"

Маълумот ўрнида Дониёр Исмоилов мазкур баҳсда жамоасининг иккинчи голига муаллифлик қилди.

"Қийин ўйин бўлди. Кўрдингиз, дастлабки 20 дақиқада ҳимояга ўтириб қолдик. Иккита голдан сўнг ўзимизга келиб олдик ва ҳужумлар уюштиришни бошладик. Биринчи бўлимда рақибнинг босимига тура олмадикми ёки кучимиз етмадими билмадим. Захирадан майдонга тушган футболчилар ўйинни кучайтиришди деб ўйлайман.

Мураббийимиз кийиниш хонасида ўз маслаҳатларини ва кўрсатмаларини бердилар. Қўрқмасдан олдинга ўтишимизни, рақибдан кам жойимиз йўқлигини ва бизга ишонишларини айтдилар. Бошқа нарсаларга эътибор бермасдан ўзимизнинг ўйинни ўйнадик ва ғалаба қозондик.

Ўйиннинг оҳирги дақиқалари яқинлашган сари тезкорликни кучайтирдик. Босим ва ҳужумларни оширдик. Биринчи бўлимда тўпни олдинга тепиб юбориб кўп хатолар қилдик. Олдинга тепиб юборишининг фойдаси йўқ. Пас билан ҳаракат қилган мақсадга мувофиқ. Танаффусдан кейин мураббийларимизни кўрсатмаларини бажаришга, улар истаган ўйинни кўрсатишга ҳаракат қилдик.

"Оқ-тепа" ҳам пас ўйнайди. Узун ва қисқа паслар орқали ҳужум ташкил қилади. Балки, улар чарчаб қолишгандир. Биринчи бўлимда улар ғалабага муносиб ўйин кўрсатишди. Биз эса иккинчи бўлимда ўйинимизни кучайтириш ҳисобига ғалаба қозондик",- дейди Дониёр Исмоилов.