Даврон Файзиев: «Бу йил Муборакдан ҳеч ким очко билан қайтмаганди, буни биз уддаладик»

- Муборакдаги ўйиндан олдин футболчиларимизга ушбу баҳсда битта гол ўйин тақдирини ҳал этишини таъкидлагандим. Биз учун энг асосийси ҳимояда мустаҳкам тўп суриб, вазиятларни голга айлантириш эди. Ўйин давомида икки томонда ҳам гол уриш учун имкониятлар бўлди. Мезбонлар ҳужумлари вақтида дарвозабонимиз ва ҳимоя чизиғимиз яхши ўйин намойиш этди. Бизда ҳам биринчи бўлим якунида жуда яхши вазият юзага келганди, аммо ҳужумчимиз дарвоза устунини нишонга олди. Бу йил ҳеч ким Муборакда “Машъал” билан баҳсда очко олмаганди, биз буни уддаладик. Муборакда пешқадам “Машъал” майдонидан очко билан қайтиш ёмон натижа эмас.

Мени ажаблантираётган жиҳат, жамоамизнинг ҳар ўйинда турли руҳий ҳолатда тушаётганлигидир. Пешқадам жамоаларга қарши жанговар кайфиятда, аутсайдер клубларга қарши кучига тўғри баҳо бермаслик кайфияти борлиги мени қониқтирмаяпти. Бу борада иш олиб борамиз.

Жамоамизга қўшилган янги футболчилар бугун дастлабки ўйинларида майдонга тушганликларини инобатга оладиган бўлсак, яхши киришиб кетишди. Акмал Холмуродов “Динамо” учун бегона эмас, у 3 йил давомида клуб шарафини муносиб ҳимоя қилган. Суҳроб Иззатов ва Аббосбек Жумақулов сингари ёшларни ижара асосида “Бунёдкор”дан олдик, улардан ҳам умидимиз катта.

Кейинги турда дам оламиз, танаффус олди сўнгги турда эса “Норин” билан майдонга фақат ғалаба учун тушамиз. Учинчи давра олдидан вазиятни имконқадар яхшилашимиз керак.