Чин инсонийлик намунаси: Грилиш онасини йўқотган оилага ёрдам берди ва мухлисларга мурожаат қилди

"The Sun" нашрининг хабар беришича, инглиз футболчиси фожиали вазиятга тушган оилага кўмак берди: 55 ёшли Мишель Йейтс 4 апрель куни тўсатдан вафот этгач, унинг яқинлари дафн маросими харажатларини қоплай олмай қолишди.

Грилиш воқеадан хабар топгач, марҳуманинг қариндошлари очган GoFundMe саҳифасига 1000 фунт стерлинг ўтказди. Қўшимчасига у ўзининг Instagram саҳифасида маблағ йиғиш ҳаволасини жойлаштирди ва обуначиларидан оғир аҳволга тушиб қолган оилани қўллаб-қувватлашларини сўради.

Грилиш ва унинг жамоаси "Манчестер Сити" 27 апрель куни "Уэмбли" стадионида "Ноттингем Форест" жамоасини ишончли тарзда мағлуб этиб, Англия Кубоги финалига чиқди.

Жек Грилиш жорий мавсум "шаҳарликлар" сафида барча мусобақаларда 31 ўйинда майдонга тушиб, 3 та гол урди ва 5 та голли узатмани амалга оширди.

Эслатиб ўтамиз, Жек Грилиш "Челси" билан баҳсда хатога йўл қўйган ҳорғин кайфиятдаги Абдуқодир Ҳусановни энг кўп қўллаб-қувватлаган футболчи бўлганди. Англия терма жамоаси аъзоси узоқ давом этган мотивацион нутқида Абдуқодирга бошни баланд тутиш ва хатони унутишни, ҳали ҳаммаси олдинда эканлигини уқтирган, ёш ҳамкасбининг кўнглини кўтарган эди.