Бугун футбол. "Олмалиқ" - "Машъал"

Турнир жадвалида "Олмалиқ" 32 очко билан 9-ўринни эгаллаб турибди. "Машъал" ҳисобида эса 35 очко бор ва бу жамоа 8-ўринда бормоқда. Демак, бугун Олмалиқ шаҳрида жадвалнинг ёнма-ён ўринларида бораётган жамоалар ўзаро баҳс олиб боришади. 

Иккинчи даврадаги "Олмалиқ" биринчи даврадаги жамоадан бирмунча фарқ қилади. Жамоа оралиқ танаффусдан сўнг ҳозирча тўққизта ўйинда майдонга тушган бўлса, шундан фақат иккитасида ғалаба қозонган. Ва ҳар иккала ғалаба ҳам уйдаги баҳсларда қўлга киритилган. "Олмалиқ" ўзидан кучсиз жамоалар - "Сўғдиёна" билан "Обод"ни мағлуб этган.

Биласизми? "Олмалиқ" қаторасига уч ўйиндан бери ғалаба қозона олмаяпти. Жамоа "Қизилқум" билан дуранг ўйнаганидан сўнг кетма-кет иккита беллашувда ютқазиб қўйди. 

"Машъал" ҳақида гапирадиган бўлсак, бу жамоа иккинчи даврани яхши бошлади, аммо охирги уч ўйинда ғалабага эриша олмади. Муборакликлар аввалига Тошкентда "Локомотив" билан дуранг ўйнашди ва кейинги турларда гол ўтказмасдан "Металлург" ва "Шўртан" устидан зафар қучишди. "Машъал" ҳатто сафарда "Қўқон-1912"ни ҳам мағлуб этиб қайтди. 

Бироқ жамоа "Бухоро"га қарши 1:1 ҳисобини қайт этганидан сўнг сафарда "Бунёдкор"дан енгилди ва уйда "Сўғдиёна" билан 0:0 ўйнади. Факт шуки, "Машъал" охирги уч ўйинда атиги биттагина гол ура олди холос. 

Биласизми? "Машъал" иккинчи даврада тўртта ғалабага эришган бўлса, шундан иккитаси Муборакда ва яна иккитаси сафар ўйинларида қўлга киритилган.