Бугун футбол. "Навбаҳор" - "Динамо"

"Навбаҳор" ўз майдонида Самарқанднинг "Динамо" клубини қабул қилади. "Навбаҳор" иккинчи даврани жуда яхши бошлади. Жамоа сафарда "Обод"ни ва ўз майдонида "Қизилқум"ни мағлуб этиб, кейин Фарғонада "Нефтчи" билан дуранг ўйнади. 

Наманганликлар биринчи давранинг дастлабки уч турида тўрт очко жамғаришганди, бу сафар эса етти очко тўплашди. Ким билади дейсиз, балки "Навбаҳор"нинг иккинчи даврадаги иштироки биринчи даврага нисбатан анча сермаҳсул чиқар. 

"Динамо"нинг эса аксинча иккинчи даврада ишлари юришмаяпти. Жамоа ҳозирча уч ўйинда атиги бир очко тўплади. Кетма-кет иккита мағлубиятдан сўнг ниҳоят "Пахтакор" билан дуранг қайд этилди. "Динамо" биринчи даврани қаторасига уч ғалаба билан бошлаганди. Аммо ҳозирги жамоадан учта ғалабани кутиш қийин. 

Бундан ташқари, "Динамо" сафарда доим ҳам бир текис ўйин намойиш эта олмаяпти. Самарқандликлар Фарғонада "Нефтчи"ни мағлуб этиб қайтишганидан бери кейинги иккита ўйинни бой беришди. Жамоа Тошкент ва Ғузорда мағлуб бўлди. Фикримизча, "Динамо" бугун ҳам ғалаба учун ўйнайди. Ўз навбатида "Навбаҳор"ни уйдаги беллашувда фақат уч очко қониқтиради. Эслатиб ўтамиз, Самарқандда кечган биринчи давра баҳсида "Динамо" 0:1 ҳисобида ютқазиб қўйган.