Боян Миладинович: "Ал Васл"да кучли мураббий ишламоқда, лекин "Пахтакор"га ишонаман"
17 сен 2024 15:18
Новости

Боян Миладинович: "Ал Васл"да кучли мураббий ишламоқда, лекин "Пахтакор"га ишонаман"

Бугун Элит Осиё чемпионлар лигаси 1-тури доирасида "Пахтакор" - "Ал Васл" учрашуви бўлиб ўтади.

Мазкур баҳсдан аввал 2009-2014 йилларда "Пахтакор" шарафини ҳимоя қилган ҳимоячи Боян Миладиновичнинг фикрлари билан қизиқдик.

"Бугун "Пахтакор" янги ташкил этилган Элит Осиё чемпионлар лигасидаги илк учрашувини ўтказади. Узоқ йиллар давомида ўзим тўп тепган жамоага бугунги баҳсда ғалаба тилайман. Оғир ўйин бўлади, сабаби "Ал Васл"да сербиялик мураббий ишламоқда. Милош Милоевич 2 йил олдин "Црвена Звезда" билан Сербия чемпиони бўлган ва мамлакат кубогини қўлга киритган ва "Ал Васл"га ўтиб кетганди. Тўғрисини айтсам, ўшанда БААга кетиб қолганидан хайрон қолгандим. Менимча яхши таклиф бўлгани учун шундай қилган. Ўтган мавсумда Милош "Ал Васл"ни БАА чемпиони қила олди ва бундан ташқари клуб БАА Президенти кубогини ҳам қўлга киритди. "Ал Васл" адашмасам 20 йил олдин (2007 йил - таҳририят) мамлакат чемпиони бўлганди. Шу сабаб "Пахтакор"ни осон бўлмаган баҳс кутиб турибди. Жамоа таркибида кучли легионерлар бор. Масалан, ярим ҳимоячи Срджан Мияилович яқиндагина Сербия миллий терма жамоаси сафида Европа чемпионатида иштирок этди. Шунга қарамай "Пахтакор" бугун яхши ўйин намойиш этиши ва очколар олишига умид қиламан.

Элит Осиё чемпионлар лигаси Ғарб минтақасида жуда кучли легионерлар бор. "Пахтакор"да эса легионерлардан Драган Черан бор. У 37 ёшда ва Черан майдонга тушмаган пайтда "Пахтакор" жуда қийналиб гол урмоқда. Барчаси Черан орқали бўлмоқда, у майдонда бўлмаса "Пахтакор" бутунлай бошқа жамоага айланмоқда. "Пахтакор" 1/8 финалга чиқишига мухлислик қиламан", - деди Боян Миладинович.