Бобур Зуҳриддинов: "Бунёдкор"дек жамоа билан дуранг ўйнаганимиздан хурсандман"

- Яхши учрашув бўлди. Режаларимизнинг 100 фоиз бўлмаса-да, анчагина қисми амалга ошди. Айрим вазиятларда камчиликларимиз ҳам кўриниб қолди. Лекин “Бунёдкор”дек рақибга қарши муносиб қаршилик кўрсатганимиздан хурсандмиз.

- Учрашувда дуранг қайд этилгани сизнинг ўйинга тўғри тактика танлаганингиз билан боғлиқми ёки рақибнинг ўйини қовушмагани сабаблими?  
- Мен бугун “Бунёдкор” яхши ўйнай олмади, демаган бўлардим. Рақиб керак бўлса, бизга “дарс” ўтди. Аввал ҳам айтгандим, биз изланиш йўлидамиз. Шундай рақибларга қарши ўйинда ўзимизга кўп нарса оламиз ва изланишда давом этамиз.

- “Бунёдкор” посбони Акбар Тўраев ҳақида фикрларингиз.
- Рақиб дарвозабони ҳақида фикр билдирмайман. Чунки ўйин давомида ўз футболчиларимнинг ҳаракатларини кузатиб бордим. Сўрадингиз айтаман: Тўраев учрашувни ёмон ўтказгани йўқ.

- Ўзингиз нима учун дарвозабонингизни алмаштирдингиз?
- Дарвозабонимизни алмаштирганимиз тактика билан боғлиқ. Биз бугунги учрашувга ҳар томонлама пуҳта тайёрлангандик. Сабаби, “Бунёдкор”дек рақибларга қарши баҳсларда хато қилишга ҳаққимиз йўқ. Биргина хато қимматга тушиши мумкин. Яна қайтараман: дарвозабонимиз ўйлаган тактика туфайли алмаштирилди.

- Хўп, ўша вазиятда дарвозабондан кўра, бирор бир футболчини майдонга тушириб, ўйинни кучайтирсангиз бўлмасмиди?
- Албатта бўларди. Бироқ айтганимдек, биз бу учрашувга жиддий тайёргарлик кўргандик. Аввалроқ ўйин режасини тузиб чиққандик.

- Футболчиларингиз иккинчи бўлимда чарчаб қолаётгандек кўринмоқда. Олий лигада бутун бир мавсумни ўтказишга жамоанинг захира ўриндиғи қисқалик қилмасмикан?
- Бизнинг асосий мақсадимиз курашувчан жамоа тузиш ва шунга ҳаракат қиляпмиз. Балки сизга захирамиз қисқадек кўринаётгандик, аммо таркибимизда муаммо йўқ. Биз бу футболчиларни декабрь ойидан бери кузатиб келяпмиз ва саралаб олганмиз.