Баҳриддин Ваҳобов: “Кубокда кейинги босқични ўз майдонимизда ўтказишимизни кутгандик”

Қуръага кўра, Термизнинг “Сурхон” жамоаси кейинги босқични ҳам сафарда ўтказадиган бўлди. Дилшод Нуралиев бошқарувидаги жамоа 1/8 босқичида Муборакнинг “Машъал” жамоаси меҳмони бўлади. Хўш, бу борада “Сурхон”нинг тажрибали ҳужумчиси Баҳриддин Ваҳобов қандай фикрда?

- Эртага чемпионат доирасидан ўрин олган “Орол”га қарши ўйинимиз бор (суҳбат 19 апрель куни бўлиб ўтди - мулаллиф). Бугун эрталаб Нукус шаҳрига етиб келдик – дея гап бошлади Ваҳобов. Кеча йўлда бўлганимиз сабабли қуръа ташлаш маросимини ТВ орқали жонли эфирда кўра олмадик. Лекин интернет орқали Кубокдаги кейинги рақибимизнинг ким эканлигини билиб олдик.

- Биласизми “Сурхон” Ўзбекистон Кубогининг 1/16 босқичини ҳам сафарда ўтказди. Шу боис кейинги босқични ўз майдонимизда ўтказишни кутгандик. Аммо яна сафарда ўйнайдиган бўлдик. Ўз уйимизда Суперлига клуби билан ўйнасак, ишқибозларимиз кўз ўнгида бошқача ўйин бўларди, назаримда.

- “Машъал” ҳақида нима дейишим мумкин. Яхши жамоа. Ўз уйида осонликча очко улашиб юбормайди. Лекин “Сурхон” ҳам сафардан ижобий натижа билан қайтишга уринади. Кейинги босқичга чиқиш имкониятини 50х50 баҳолаган бўлардим.

- Кубокдаги мақсадимиз имкон қадар узоқроққа боришдир. Қолганини вақт кўрсатади.

- Чемпионатнинг биринчи ўйинида “Шўртан” билан ўз майдонимизда нурсиз дуранг қайд этиб қўйдик. Тўғриси, шу куни бироз ҳаяжон босди. Ишқибозларимиз қаршисида фақат ва фақат ғалаба қозониш шартлигини йигитлар ҳаддан зиёд ўзига оворди. Босим кучайиб кетди. Кейинчалик ҳаммаси изига тушиб кетади деган умиддаман - дейди Баҳриддин Ваҳобов.