Баҳодир Шаймардонов: "Про-лига ўйинлари Суперлигадан қолишаётгани йўқ"

Ўйин ҳақида

- Бугун қизиқарли учрашув гувоҳига айландик. Ҳар икки жамоа бутун ўйин давомида фаол ҳаракат қилди. Бугунги ўйинда иштиёқимиз баланд эди, Муборакка ғалаба истагида келгандик. Вазиятлар яратаяпмиз, аммо якуний зарбаларда камчиликларимиз борлиги кўриниб қолди. Ишлашда давом этамиз. Насиб бўлса кейинги турда астойдил ҳаракат қилиб навбатдаги босқич масаласини ҳал этамиз деган умиддамиз.

- Бугун "Машъал" кўрсатган ўйиндан уларга кейинги босқич зарур эмасдек кўринди. Сизнингча, мезбонлар бугун ўйинда 2-таркиб билан ҳаракат қилдими?

- Бошқа жамоанинг тактик схемаси ҳақида гапириш ниятим йўқ. Уйда ўйнаган ҳар бир жамоа ғалаба учун ўйнайди. Рақибда ҳам, бизда ҳам голли вазиятлар бўлди. Фақат бу вазиятлардан икки жамоа ҳам фойдалана олмади.

- Сиз ва "Ғиждувон" олдига қандай мақсад қўйилган?

- Жамоамиз бу йилдан Про-лигада иштирок этаяпти. Олдимизда кучли ва рақобатбардош жамоани шакллантириш вазифаси турибди. Ўзларинг кўриб бораяпсизлар, ҳозирда Про-лигада ўйинлар Суперлигадан қолишаётгани йўқ. Ҳар бир очко олтинга тенг деб ҳисоблайман. Клубимиз раҳбарияти, хомийлар астойдил ҳаракат қилишаяпти, бизда жамоани янада кучайтириш учун ҳамма шароитлар бор. Бу йилги мақсадимиз чемпионатни кучли бешликда якунлаш.

- Бугун "Ғиждувон" очиқ футбол кўрсатди. "Қўқон-1912"га қарши ўйиндаги йирик мағлубиятдан сўнг бу каби таваккал қилишга чўчимадингизми?

- "Қўқон-1912" билан ўйинда вазият биз кутмаган тарзда бўлди. Биринчи бўлимда турли тактикаларни синаб кўришга мажбур бўлдик. Айтганимдек, мажбуран ҳимояни кучайтирдик. Иккинчи бўлимда барчасини ўз ўрнига қўйиб олдик ва ўйинимиз сифати ўзгарди.

- Бугунги ўйинда дарвозабон мажбуран алмаштирилди. Айни дамда унинг холати қандай?

- Дарвозабонимиз тирсак қисмдан озроқ жароҳат олибди. Шу сабабдан уни алмаштиришга мажбур бўлдик. Ҳозирда дарвозабон холати яхши, хавотирли жойи йўқ.