АПЛда жавлон урган, ҳозир эса мураббийлик қилаётган юлдузлар

"Daily Star" мана шундай футболчилар хусусида сўз юритди.

Дамьен Дафф ("Шелбурн", Ирландия)

Футболчилик фаолияти давомида "Челси", "Ньюкасл" ҳамда "Фулхэм" жамоаларида тўп тепган Дамьен Дафф 2015 йилда бутсаларини михга илади. У фаолиятини Ирландиянинг "Шемрок Роверс" жамоасида якунлайди. Шундан кейин у бирданига мураббийлик соҳасига қадам ташлаб, ушбу жамоанинг U-15 ёшлар таркибида ишлайди. Кейинчалик U-17'ни бошқаради. Орада Шотландиянинг "Селтик" клубида ҳам ишлайди. 2021 йилдан эса яна ватанида, аниқроғи, "Шелбурн"да фаолиятини давом эттирмоқда.

Оуэн Койл ("Жамшедпур", Ҳиндистон)

Шотландиялик собиқ ҳужумчи Оуен Койл фаолияти давомида "Болтон" сафида ўйнаган. Қолган вақтини эса ватанининг турли жамоаларида ўтказган. Оуэн бутсаларини михга илганидан сўнг дарҳол мураббийлик қилишни бошлаган. "Фалкирк", "Данди", "Бёрнли","Болтон" каби жамоаларда фаолият кўрсатган. Орада океан ортига бориб, "Хьюстон"ни бошқарган. 2019 йилдан буён эса у Ҳиндистонда ишламоқда. Дастлаб "Ченнайин", кейинчалик "Жамшедпур" устозига айланди. Ҳозирда у мазкур жамоани бошқаришда давом этмоқда.

Жои Бартон ("Бристоль Сити")

Жанжалкашлик ва турли масхарабозликлар билан ном қозонган Жои Бартон футболчи сифатида машҳурликка эришмаган. Тўғри, у "Манчестер Сити"да ўйнаган, "Ньюкасл"да ҳам ҳаракат қилган. Аммо у вақтда бу жамоалар бугунги кундагидек эмасди.

Футболдан кетганидан сўнг Бартон "Флитвуд Таун"ни бошқарди. Жои уч йил давомида тажриба тўплади. 2021 йилдан бошлаб эса "Бристоль Роверс"да мураббийлик қилмоқда.

Нури Шахин ("Антальяспор", Туркия)

Жароҳат сабаб баъзан яхши футболчилар фаолиятини якунлашга мажбур бўлишади. Жумладан, туркиялик Нури Шахин қисмати бунга мисол бўла олади. Айни вақтда у 33 ёшда. Бир йил аввал бутсаларини михга илди. Албатта, унинг фаолиятида яхши жамоалар кўп бўлган. "Боруссия Д", "Реал" ва "Ливерпуль" номларини тилга олиш мумкин. Эндиликда эса "Антальяспор"ни бошқармоқда. Шахинда катта тажриба бўлмаса-да, у жамоани бошқаришда давом этмоқда. Раҳбарият унга катта ишонч билдирди.

Тему Тайнио ("Хака", Финляндия)

Совуқ ўлкали собиқ ярим ҳимоячи АПЛда жавлон урган. "Тоттенхэм", "Сандерленд" ва "Бирмингем" шарафини ҳимоя қилган. Кейинчалик "Аякс" ва "Нью-Йорк Ред Буллз"да ҳаракатланган. Ҳозирги кунда Финляндиянинг "Хака" жамоасида ишлаяпти.

Дарвоқе, у 2015-2016 йилларда "Тоттенхэм"да скаут вазифасида ҳам меҳнат қилган.

Самандарбек таржимаси