Винисиус яхши ўйнамаётганини тан олмоқда, аммо...

"Мадрид" мухлислари 17 ўйиндан бери гол ура олмаётган Бразилия терма жамоасининг 25 ёшли футболчисини Ла Лига доирасидаги "Севилья"га қарши ўйинда (2:0) алмаштирилганидан сўнг, майдонни тарк этаётган пайтда ҳуштакбозлик билан кутиб олишди. Ўйинчи Инстаграмдан "қаймоқранглилар" либосидаги суратини ўчириб ташлади ва кўп нуқта қолдирди. "Реал" мураббийи Хаби Алонсо: "Мухлислар ўз фикрини билдириш ҳуқуқига эга", – деб баёнот берди.

"The Athletic" нашрининг жамоадаги манбаларга таяниб хабар беришича, Винисиус клуб ичида яхши ўйнамаётганини тан олган, аммо шу билан бирга бразилиялик футболчи жамоанинг ишлари юришмаётганда, умумий футболчилар орасидан айнан уни ажратиб кўрсатишаётганини ҳис қилмоқда.

"Реал" "Барселона" билан ўйинда алмаштирилганига ўта ҳиссиёт билан муносабат билдирганидан сўнг вингерга нисбатан интизомий чора кўрмасликка қарор қилди, бироқ клубдаги манбалар Винисиуснинг хулқ-атворидан ҳафсаласи пир бўлганини билдириб, буни тажрибали ўйинчидан кутиладиган ҳаракатга зид қўйишди.

Даниэль Карвахаль ва Федерико Вальверде йўқлигида ҳужумчи шанба куни "Сантьяго Бернабеу"даги ўйинда сардорлик қилди. Ўйин бошида камералар унинг мухлислар ҳуштакбозлигидан нолиганини муҳрлаб қўйди. "Биз нима қилдик? Мен нима қилдим? Бу ўйиннинг биринчи дақиқаси-ку... Лаънат!", – деди Винисиус.