Андрей Фёдоров: "Асосийси мағлуб бўлмадик"

- Асосийси бугунги учрашувда мағлубиятга учрамадик. Биз бунданда яхшироқ ўйнашимиз керак, бунга мажбурмиз. Бундай рақиблар билан баҳслардаги дуранг - бизни қониқтирмайдиган натижа десам нотўғри бўлмайди. Биринчи бўлиб гол ўтказиб юбораётган ўйинлар бизда кўп кузатилмоқда. Унда рақиблар ҳимояда кўп сонли футболчилар билан ўйнашмоқда. Аммо айрим учрашувларда биз натижани қўлга кирита оляпмиз.

Бугун "Қизилқум" ҳимоясида футболчилар анчагина кўп бўлди. Улар ўз жарима майдонлари яқинида тартибли ўйин кўрсатишлари натижасида шогирдларим кўплаб зарбалар бера олишмади. Агарда рақиблар очиқроқ ўйин намойиш қилишса, зарбаларимиз ҳам кўпроқ бўларди.

Тўхтахўжаевнинг кичик жароҳати бор эди. Шу боисдан уни эртароқ алмаштирдик.

Албатта, ҳар доим янги футболчиларни ўз сафимизга қўшиб олишга ҳаракат қиламиз. Улар бизнинг даражамиздан ҳам кучлироқ бўлиши керак.

Айни дамда барча легионерларимиз кучли. Нивалдо анча ўйинларни ўтказиб юборди ва шу сабабли унинг ўйинлари ўхшамаяпти. Чо Сук Жани ўз уйига кетказиб юбордик. У ҳам яхши савияли футболчи, бироқ у бегона давлат футболини, бегона тилни ўргана олмади. У ўз мамлакатини, яқинларини соғинди ва шу боисдан у раҳбариятга келиб, кетишини ва ўзининг ўрнига бошқа футболчи олиб келишни айтди.

Икром Алибоев: "Бугунги учрашув қийин бўлди. "Қизилқум" биз кутгандан ҳам яхшироқ ўйин намойиш қилди. Биз ўз ўйинимизни кўрсата олмаётган бир вақтда улар қарши ҳужумда бизни жазолашди. Бугун мағлубиятга тенг дурангни қайд этдик.