Анчелотти: "Футбол ҳаёти шундай – вақти келиб ҳар қандай авлод кетади"

"Мен хафа эмасман, бахтли ҳолда кетяпман. Бу ерда қилган барча ишларимиздан бахтлиман. Миннатдорман. Бу ажойиб давр бўлди.

Клуб ва президент билан ҳеч қачон муаммоларим бўлмаган, ҳамма нарса келишилган эди. Ҳаммаси яхши. Флорентино Перес биринчи кундан то охирги кунгача мени қўллаб-қувватлади.

Эртага жуда ҳиссиётли кун бўлади. Агар йиғласам, кўзёшларимни яширмайман. Бу кунни Лука билан баҳам кўраман... афсона, фантастик ўйинчи. Лука билан хайрлашув ажойиб бўлади.

Айтиш мумкинки, Модричнинг кетиши билан "олтин" авлод даври якунланмоқда. Карвахаль ҳали ҳам жамоада, бироқ у ҳозирда жароҳатда. Аммо футбол ҳаёти шундай – вақти келиб ҳар қандай авлод кетади. Бундан олдин Каземиро, Криштиану Роналду ҳам кетган эди... Шундай бўлса-да, "Реал" дунёдаги энг яхши клуб бўлиб келган, ҳозир ҳам шундай ва бундан кейин ҳам шундай бўлиб қолади.

Хабига барча яхшиликларни тилайман. Унда бу жамоани бошқариш учун зарур бўлган сифатлар бор ва умид қиламанки, бу унга ёқади.

"Реал"даги энг яхши ўйин? Айтиш жуда қийин. Биз барчамиз ПСЖ, "Челси" ва "Сити"га қарши ремонтадаларни эслаймиз. Буни унутиб бўлмайди.

Менинг "Реал" билан асал ойим абадий давом этади – бу менинг ҳаётимдаги клуб", – деди Анчелотти.

Расман: "Реал" Анчелотти кетаётганини эълон қилди